Қостанай облысында киіктер қырылды

ҚОСТАНАЙ. 13 мамыр. Қостанай облысының Амангелді ауданында қырылған киіктердің өлекселері табылды. Бұл туралы egemen.kz тілшісі хабарлады. Осыдан бір-екі күн бұрын «Алтын дала» резеватына кіретін Амангелді ауданынан 100 бас киіктің өлексесі табылған болатын. Осыны естісімен облыстағы бірнеше ведомствоның басшылары Амангелді ауданы аумағын ұшақпен ұшып өтті. Бүгінге дейін облыстық орман шаруашылығы және жануарлар әлемі аумақтық инспекциясының мамандары оның 117-ге жеткенін анықтады. Мамандардың айтуынша, киіктер көтеремдіктен қырылған. Марат Бегімбетов: «Киіктердің өлекселерінен оларды атқан белгі білінбейді. Өлген киіктің екеуі текесі, бесеуі құралайы, қалғаны ешкісі. Киіктер көтермдіктен қырылды деген болжам бар. Оның нақты себебін, соңғы қорытындыны зерттеуге кеткен мамандар айтатын болады», деді. Киіктердің көтерем болуына өткен жаздағы қуаңшылық себеп болды. Жердің шаңы шығып жатырқандықтан, киіктердің тісіне ілінер шөп болмаған. 2012 жылы киіктердің бұлай қырылуы Жангелдин ауданында да орын алған болатын. Онда киіктің 200-ден астам өлексесі жиналып, жойылған болатын. Нәзира Жәрімбетова. Дерек, сурет: egemen.kz