Петропавлдық кейуананы балалары тастап кетті

ПЕТРОПАВЛ. 13 мамыр. Осыдан үш ай бұрын беломыртқасын сындырып алып, содан бері төсек тартып жатқан кейуанаға көршілерінен басқа қарайласатын ешкім байқалмайды. Өздігінен қозғалуға әл-дәрмені жоқ бейбақ қарттар үйіне орналастыруға шенеуніктерден көмек сұрап отыр. Бұл туралы КТК телеарнасы хабарлады. Жасы сексенді алқымдаған Надежда Подлесная наурызда ауруханада жатып шыққан. Содан бері өмірдің ауыр тауқыметін тартып келеді. Көршілері ас-суына ғана қарайласады. Көрпе-төсегін жуатын, шомылдыратын адам жоқ. «Өздігінен жүре алмағандықтан, түні бойы айғайлап, жәрдем сұрайды.   Естуімізше, бұған дейін ұл-қыздарымен Ақтауда тұрған. Ондағы пәтерін балалары сатып жіберіп, Петропавлдағы жатақханадан бір бөлме әперген. Өздері Ресейге тайып отырған. Оларды әлеуметтік желі арқылы тауып алып сөйлескенімізде, біз онымен тұра алмаймыз. Сендер зейнетақысына күтуші жалдаңдар деген жауап алдық», дейді көршісі Жанна Елтаева безбүйрек  перзенттері жайлы. Қыста дәлізде оқыстан құлап, омыртқасын сындырып алғанша зейнеткер күнін ешкімге түсірмеген. Төсек тартып қалғалы көршілері тиісті мекемелерге шағымданып, қарттар үйіне алуды өтінген.  Мемлекеттік мекемеге кезек көп болғандықтан, қалалық жұмыспен қамту бөлімі құжаттарын жекеменшік қарттар үйіне рәсімдеп жатса керек. Петропавл қалалық жұмыспен қамту және әлеуметтік бағдарламалар бөлімі басшысының орынбасары Аққанат Жәкенова таяу күндері мәселенің шешілетініне сендіріп отыр. Өмір Есқали. Дерек: КТК телеарнасы. Сурет: egemen.kz