САЛАМАТТЫ ӨМІРГЕ ТАҒЫ БІР ҚАДАМ

Өткен аптада Астанада жаңадан салынған көп бағытты балалар спорт ауласының салтанатты түрде ашылуы болып өтті. Оны №51 мектепке және оған жақын орналасқан аудан тұрғындарына арнап “ҚазМұнайГаз” ұлттық компаниясы салдырған болатын. Енді жаңа тұрғын үй кешенінде тұратын оқушылар бос уақыттарында футбол, волейбол, баскетбол, үлкен теннис және өзге де спорт ойындары түрлерімен айналысуға кең мүмкіндік алды. Астана қаласы өсіп, барлық салалар бой­ынша қарқынды дамып келеді. Елордамен бірге оның кіш­­кентай тұрғын­дары да бірге жел­кіл­деп өсуде. Осы орай­да қаламыздың жас тұрғындары үшін спорт то­лық­қанды дамуының бөлінбес бөлшегіне айналуы тиіс. Мұны еліміздің бас мұнай компаниясының басшылары да жақсы түсінеді. Сондықтан Ел­басы Нұр­сұлтан Назарбаевтың бұ­қаралық спортты дамыту мақсатында көтерген бастамасын ең алғаш­қы­лардың бірі болып “ҚазМұ­най­Газ” ұлттық компаниясы қолдаған бо­ла­т­ын. Компания қаржылай қолдау көрсететін 2010-2011 жылдарға арна­лып жоспарланған бағдарламалар тізіміне сәйкес, Қазақстан бойынша мұндай көп бағытты спорт аулала­рының әлі 50-і салынбақ. Астанада қолдануға берілген осындай екінші кешеннің ашылуы салтанатында “ҚазМұнайГаз” ҰК” АҚ-тың бизнесті қолдау бөлімінің бас менеджері Серікбек Елшібеков бұл бағдарламаның спорттың бұқа­ралық түрлерімен айналысуға жағдай жасау мақсатында ұйымдастырыл­ға­нын атап өтті. Жаңа кешен жас­өс­пі­рімдер мен балалар арасында сала­мат­ты өмір салтын насихаттауға, олар­ды спортқа қызықтыру, тарту үшін арнайы ашылып отырған көрінеді. – Біздің компания спорттық ау­ла­ларды тек қана белгілі бір мектеп оқу­шыларына арнап емес, сондай-ақ оның айналасында орналасқан ба­ла­лар үшін де, яғни ортақ игілікке са­лып отыр. Өйткені, біз балалардың көп­шілігі өздерінің сүйікті спорт түр­ле­рімен заманауи және керемет жа­ра­қ­танды­рылған спорт алаңқай­ла­рында айна­лысуға мүмкіндік алға­нын қалаймыз, – деп атап көрсетті С. Елшібеков. 0,3 гектар аумақты алып жатқан кешен шындығында да көрген көзге өте әсерлі. Құрылыстың заманауи техника­лары арқасында мұнда кіші футбол, волейбол, баскетбол, үлкен теннис, өзге де спорт түрлерінен түрлі жаттығулар мен жарыстар өт­кізуге болады. Өзге кешен­дермен бірге жинақта толыққанды хоккей корты да бар. Тенниске арналған бө­лікте – Уимблдон жаттығуларында қолданы­латын жоғары сапалы син­те­тикалық төсем бар, ал мектептің футбол коман­дасы FІFA UEFA сертификатынан өткен жасанды көгал алаңда жаттыға алады. Қыста жарақаттанудың алдын алатын аязға шыдамды аула төсемі балаларды жай­лы әрі қауіпсіз жағдаймен қам­та­масыз етеді. Төсемдер қатыру-қай­та­дан ерітудің көптеген тізбегін кө­те­ре алады. Ал бұл Астананың кли­мат­тық жағдайы үшін маңызды фак­тор болып табылады. Кешен спорт­пен кешкі уақыттарда айналысқысы келетіндерге орай қосымша жарық беретін діңгектермен жарақтан­ды­рылған. Кешен құрылысын салу бары­сын­да барлық экологиялық, сани­тар­лық-ги­ги­е­­налық, өртке қарсы нормалар мен ере­желер қатаң сақ­талды. Қолданысқа берген соң 5 жыл кепілдігі тағы бар. С.Елші­бе­ковтің айтуынша, мұндай ке­шен­дер­дің мектептер аумағында тұрғызы­лу­ында өзіндік сыры бар көрінеді. Мұның себебі, оқушылардың жай­лы­лығы үшін әрі кешен бақылаусыз, қа­раусыз қалмайды. Оның қызы­ғу­шылық тудырғаны сонша­лықты, тіпті құрылыс кезінде жергілікті бала­қайлар алаңқайды көріп, пай­далану өтінішімен келген екен. Ашы­лу салта­на­тында спорт сүйе­тін­­дер көптеп жиналды, ал балақайлар лезде жасыл төсемнің барлық артықшылықтарын бағалап үл­герді. Үлкендердің алғысты сөздерінен кейін мектеп директорына кешеннің символдық кілті табысталды. Сон­дай-ақ, олимпиялық резервті дай­ын­дайтын ба­лалар мен жасөспірімдер спорт мектебі командасының кон­церті өтті. №51 орта мектеп оқушы­лары жолдастық кездесулер өткізді. Допты қақпаға бірінші енгізу рәсімі С. Елшібековке берілді. Он жасар Владислав Ивачев кә­сіби футболмен екі жыл қатарынан айналысып келді. Анасының айту­ын­ша, балақай қыстың қақаған суы­ғында да, жаңбырға да қарамастан бір де бір жаттығудан қал­мапты. №8 олимпиялық резерв дайын­дайтын балалар мен жасөспірімдер спорт мектебінің өкілі, бапкер Вячеслав Про­ко­пенко жаңа футбол алаңының ашылға­ны­на қуанышты екендігін білдірді. Өйткені, ол қалада әлі де жеткіліксіз. Балаларға жа­саған қам­қорлықтары үшін қазмұнайгазд­ық­тарға Алматы ауданының білім бөлімі бастығы Айна Қаспақова алғысын біл­діріп, мұнда нағыз чем­пиондар тәрбие­леніп шыға­ты­н­дығына сенім білдірді. Тәжірибелі футболшылар, 10-сынып оқушылары Медеу Асхат­ұлы мен Заңғар Серікұлы “Астана” символикалық әнін орындады. “ҚазМұнайГаз” ұлттық компа­ния­сы қоғамдық нысандарды тұр­ғы­зуға, соның ішінде спорттық кешен­дер­ді салуды қар­жыландыруға әрдай­ым үлкен маңыз беріп келеді. Оның дәлелі ретінде Аста­надағы “Каспий” спорт кешенін, Жаңа­өзендегі Р.Өте­сінов атындағы дене шы­ны­қ­тыру-сауықтыру кешенін атауға болады. Жаңа оқу жылына орай Астанада “Қаз­Мұ­най­Газ” ҰК” АҚ бағдар­ла­масын жү­зеге асыру барысында осындай 10 зама­на­уи спорт ауласын ашу жоспарланып отыр. Ал келесі жылы олардың саны елуге дейін өспек. Бастамашылардың сұрайтын бір ғана тілегі, кешенді мұқият сақ­тап қа­рау. Сондай-ақ, олар азамат­тар­ды өз ден­са­улықтарына пайда тигізу үшін үнемі осы спорт аула­ларына келуге шақырады. Сана ҰЯБЕКОВ. АСТАНА.