Қазақстан Республикасы Үкіметінің қаулысы  №123

2015 жылғы 11 наурыз, Астана, Үкімет Үйі Облыстық бюджеттердің, Астана және Алматы қалалары бюджеттерінің 2015 жылға арналған республикалық бюджеттен денсаулық сақтауға берілетін ағымдағы нысаналы трансферттерді пайдалану қағидаларын бекіту туралы «2015 – 2017 жылдарға арналған республикалық бюджет туралы» 2014 жылғы 28 қарашадағы Қазақстан Республикасы Заңының 15-бабын және «2015 – 2017 жылдарға арналған республикалық бюджет туралы» Қазақстан Республикасының Заңын іске асыру туралы» Қазақстан Республикасы Үкіметінің 2014 жылғы 11 желтоқсандағы № 1300 қаулысын іске асыру мақсатында Қазақстан Республикасының Үкіметі қаулы етеді: 1. Қоса беріліп отырған Облыстық бюджеттердің, Астана және Алматы қалалары бюджеттерінің 2015 жылға арналған республикалық бюджеттен денсаулық сақтауға берілетін ағымдағы нысаналы трансферттерді пайдалану қағидалары бекітілсін. 2. Қазақстан Республикасы Денсаулық сақтау және әлеуметтік даму министрлігі заңнамада белгіленген тәртіппен ағымдағы нысаналы трансферттердің бекітілген сомаларын облыстық бюджеттерге, Астана және Алматы қалаларының бюджеттеріне аударуды қамтамасыз етсін. 3. Облыстардың, Астана және Алматы қалаларының әкімдері: 1) ағымдағы нысаналы трансферттердің бөлінген сомаларын уақтылы және мақсатты пайдалануды; 2) есепті айдан кейінгі айдың 15-күніне дейін Қазақстан Республикасы Денсаулық сақтау және әлеуметтік даму министрлігіне ағымдағы нысаналы трансферттердің бөлінген сомаларының пайдаланылуы туралы есептер беруді қамтамасыз етсін. 4. Осы қаулы 2015 жылғы 1 қаңтардан бастап қолданысқа енгізіледі және ресми жариялануға тиіс. Қазақстан Республикасының Премьер-Министрі К.МӘСІМОВ. Қазақстан Республикасы Үкіметінің 2015 жылғы 11 наурыздағы №123 қаулысымен бекітілген Облыстық бюджеттердің, Астана және Алматы қалалары бюджеттерінің 2015 жылға арналған республикалық бюджеттен денсаулық сақтауға берілетін ағымдағы нысаналы трансферттерді пайдалану қағидалары 1. Жалпы ережелер 1. Осы Облыстық бюджеттердің, Астана және Алматы қалалары бюджеттерінің 2015 жылға арналған республикалық бюджеттен денсаулық сақтауға берілетін ағымдағы нысаналы трансферттерді пайдалану қағидалары (бұдан әрі – Қағидалар) «2015 – 2017 жылдарға арналған республикалық бюджет туралы» Қазақстан Республикасы Заңының 15-бабына және «2015 – 2017 жылдарға арналған республикалық бюджет туралы» Қазақстан Республикасының Заңын іске асыру туралы» Қазақстан Республикасы Үкіметінің 2014 жылғы 11 желтоқсандағы № 1300 қаулысына сәйкес әзірленді. 2. Осы Қағидаларда пайдаланылатын негізгі ұғымдар: 1) кешенді жан басына шаққандағы нормативтің ынталандырушы компоненті (бұдан әрі – ЖНЫК) – уәкілетті орган айқындайтын тәртіппен индикаторлардың негізінде қол жеткізілген түпкілікті қызмет нәтижелері үшін медициналық-санитариялық алғашқы көмек (бұдан әрі – МСАК) көрсететін денсаулық сақтау субъектісінің қызметкерлерін ынталандыруға бағытталған құраушы кешенді жан басына шаққандағы нормативтің ынталандырушы компоненті; 2) денсаулық сақтау саласындағы уәкілетті орган (бұдан әрі – уәкілетті орган) – азаматтардың денсаулығын сақтау, медициналық және фармацевтикалық ғылым, медициналық және фармацевтикалық білім беру, дәрілік заттардың, медициналық мақсаттағы бұйымдар мен медициналық техниканың айналысы, медициналық қызметтер көрсету сапасын бақылау саласындағы басшылықты жүзеге асыратын мемлекеттік орган; 3. Осы Қағидалар облыстық бюджеттердің, Астана және Алматы қалалары бюджеттерінің республикалық бюджеттен денсаулық сақтауға берілетін ағымдағы нысаналы трансферттерді мынадай республикалық бюджеттік бағдарламалар бойынша пайдалану тәртібін айқындайды: 1) 004 «Облыстық бюджеттерге, Астана және Алматы қалаларының бюджеттеріне жергілікті атқарушы органдардың мемлекеттік білім беру тапсырысы негізінде техникалық және кәсіптік, орта білімнен кейінгі білім беру ұйымдарында білім алушылардың стипендияларының мөлшерін ұлғайтуға берілетін ағымдағы нысаналы трансферттер»; 2) 010 «Облыстық бюджеттерге, Астана және Алматы қалаларының бюджеттеріне тегін медициналық көмектің кепілдік берілген көлемін қамтамасыз етуге және кеңейтуге берілетін нысаналы ағымдағы трансферттер»; 3) 022 «Облыстық бюджеттерге, Астана және Алматы қалаларының бюджеттеріне жергілікті деңгейде медициналық денсаулық сақтау ұйымдарын материалдық-техникалық жарақтандыруға берілетін ағымдағы нысаналы трансферттер». 2. Жергілікті атқарушы органдардың мемлекеттік білім беру тапсырысы негізінде техникалық және кәсіптік, орта білімнен кейінгі білім беру ұйымдарында білім алушылардың стипендия мөлшерін ұлғайтуға республикалық бюджеттен берілетін ағымдағы нысаналы трансферттерді пайдалану 4. Облыстық бюджеттерге, Астана және Алматы қалаларының бюджеттеріне берілетін ағымдағы нысаналы трансферттер «Білім беру ұйымдарында білім алушыларға мемлекеттік стипендияларды тағайындау, төлеу қағидаларын және мөлшерін бекіту туралы» Қазақстан Республикасы Үкіметінің 2008 жылғы 7 ақпандағы № 116 қаулысына сәйкес жергілікті атқарушы органдардың мемлекеттік білім беру тапсырысы негізінде медициналық колледждерде білім алушылардың стипендияларының мөлшерін 10 %-ға ұлғайту үшін пайдаланылады. 3. Тегін медициналық көмектің кепілдік берілген көлемін қамтамасыз етуге және кеңейтуге берілетін ағымдағы нысаналы трансферттерді пайдалану тәртібі 5. Облыстық бюджеттерге, Астана және Алматы қалаларының бюджеттеріне тегін медициналық көмектің кепілдік берілген көлемін (бұдан әрі – ТМККК) қамтамасыз етуге және кеңейтуге берілетін ағымдағы нысаналы трансферттер: 1) скринингтік зерттеулер жүргізуге: балалар мен ересектердің нысаналы топтары арасында «В» және «С» гепатиттерін анықтауға; әйелдер арасында жатыр мойны обырын анықтауға; ересек тұрғындар арасында колоректалдық обырды екі кезеңдік әдіспен анықтауға; ерлер арасында қуықасты безі обырын анықтауға; тұрғындар арасында өңеш обырын, асқазан және бауыр обырын анықтауға; сүт безі обыры бойынша скринингтің екінші кезеңін жүргізуге; 2) ТМККК шеңберінде онкологиялық науқастарға медициналық көмек көрсетуге, сондай-ақ Қазақстан Республикасы Үкіметінің 2009 жылғы 30 қазандағы № 1729 қаулысымен бекітілген ТМККК көрсету бойынша дәрілік заттарды, профилактикалық (иммунобиологиялық, диагностикалық, дезинфекциялық) препараттарды, медициналық мақсаттағы бұйымдар мен медициналық техниканы, фармацевтикалық қызметтерді ұйымдастыру және өткізу ережесіне сәйкес қаржы лизингі шарттарында сатып алынған медициналық техника үшін лизинг төлемдерін өтеу шығыстарына; 3) ТМККК шеңберінде аудандық маңызы бар және ауылдың денсаулық сақтау субъектілерінің медициналық көмек (шығындарын өтеу республикалық бюджет қаражаты есебінен жүзеге асырылатын жоғары мамандандырылған медициналық көмекті және гемодиализ қызметтерін қоспағанда) және тіркелген тұрғындарға амбулаториялық-емханалық көмек көрсетуіне, оның ішінде ЖНЫК төлеу шығыстарына және Қазақстан Республикасы Үкіметінің 2009 жылғы 30 қазандағы № 1729 қаулысына сәйкес қаржы лизингі шарттарында сатып алынған медициналық техниканы пайдалана отырып көрсетілген медициналық қызмет үшін лизинг төлемдерін өтеу шығыстарына; 4) амбулаториялық-емханалық ұйымдарда онкологиялық, маммологиялық кабинеттерді, сондай-ақ онкологиялық диспансерлерде (бөлімшелерде) амбулаториялық химиотерапия кабинеттерін, консультациялық-диагностикалық емханаларда (орталықтарда), көп бейінді ауруханалардың бөлімшелерінде проктологиялық кабинет ашуға және олардың жұмыс істеуіне; 5) онкологиялық диспансерлерде әлеуметтік қызметкерлер мен психологтар ұстауға; 6) диабетке қарсы препараттарды, туберкулезге қарсы препараттарды, гематологиялық науқастарға арналған химиялық препараттарды, гемофилиямен ауыратын науқастарға қан ұйыту факторларын, жіті миокард инфаркты бар науқастар үшін тромболитикалық препараттарды, «В» және «С» вирустық гепатиттерімен ауыратын балаларды және ересектерді емдеуге арналған дәрілік заттарды, АИТВ инфекциясын жұқтырған адамдарды емдеуге және байланыста болғаннан кейінгі адамдардың профилактикасына арналған ретровирусқа қарсы препараттарды, миастениямен ауыратын науқастарды емдеуге арналған препараттарды, реналдық анемиясы бар бүйрек функциясының созылмалы жетіспеушілігімен ауыратын науқастарды емдеуге арналған препараттарды, муковисцидозбен, мукополисахаридозбен, Гоше ауруымен ауыратын балаларды емдеуге арналған препараттарды, бытыраңқы берішпен ауыратын науқастарға арналған препараттарды, амбулаториялық деңгейде онкологиялық науқастарға арналған дәрілік заттарды (таргеттік препараттар), белгілі бір аурулары: жүректің ишемиялық ауруы, артериялық гипертензия, жүрек функциясының созылмалы жетіспеушілігі, аритмия, пневмония, өкпенің созылмалы обструктивтік ауруы, асқазан мен ұлтабардың ойық жарасы бар тұрғындарды амбулаториялық деңгейде тегін қамтамасыз ету үшін дәрілік заттар мен медициналық мақсаттағы бұйымдарды сатып алуға пайдаланылады. 6. Осы Қағидалардың 5-тармағының 4) және 5) тармақшаларында көрсетілген шығыстарды қоспағанда, облыстардың, Астана мен Алматы қалаларының денсаулық сақтауды мемлекеттік басқарудың жергілікті органдары уәкілетті орган бекіткен ТМККК көрсету жөніндегі қызметтер берушіні таңдау және оның шығындарын өтеу қағидаларына сәйкес ТМККК көрсету бойынша медициналық қызметтер берушіні таңдау рәсімін жүзеге асырады. 7. ЖНЫК төлеуге бөлінетін нысаналы ағымдағы трансферттер түріндегі республикалық бюджет қаражатының есебінен көрсетілетін медициналық көмектің көлемі мен сапасына қарай медицина қызметкерлеріне еңбекақы төлеу және салалық көтермелеу жүйесінің тәртібі «Салалық көтермелеу жүйесінің кейбір мәселелері туралы және көрсетілетін медициналық көмектің көлеміне, сапасына қарай медициналық қызметкерлерге еңбекақы төлеу және салалық көтермелеу жүйесі қағидасын бекіту туралы» Қазақстан Республикасы Денсаулық сақтау министрінің міндетін атқарушының 2009 жылғы 10 қарашадағы № 689 бұйрығына сәйкес жүзеге асырылады. 8. Тарифтерді қалыптастыру және ЖНЫК-ты айқындау «Тегін медициналық көмектің кепілдік берілген көлемі шеңберінде көрсетілетін медициналық қызметтерге арналған тарифтер жасау мен шығындарды жоспарлау әдістемесін бекіту туралы» Қазақстан Республикасы Денсаулық сақтау министрінің 2009 жылғы 26 қарашадағы № 801 бұйрығымен бекітілген ТМККК шеңберінде көрсетілетін медициналық қызметтерге арналған тарифтерді жасау мен шығындарды жоспарлау әдістемесіне сәйкес жүзеге асырылады. 9. Онкологиялық науқастарға көрсетілген медициналық қызметтерге ақы төлеу «Онкологиялық науқастарға тегін медициналық көмектің кепілдік берілген көлемі шеңберінде көрсетілген медициналық қызметтерге ақы төлеу қағидаларын бекіту туралы» Қазақстан Республикасы Денсаулық сақтау министрінің міндетін атқарушының 2014 жылғы 11 ақпандағы № 82 бұйрығымен айқындалған тәртіппен жүзеге асырылады. Аудандық маңызы бар және ауылдың денсаулық сақтау субьектілерінің ТМККК шеңберінде бекітілген халыққа медициналық және амбулаториялық- емханалық көмек көрсеткені үшін ақы төлеу «Тегін медициналық көмектің кепілдік берілген көлемі шеңберіңде көрсетілген медициналық қызметтер үшін ақы төлеу қағидаларын бекіту туралы» Қазақстан Республикасы Денсаулық сақтау министрінің 2014 жылғы 17 ақпандағы № 97 бұйрығымен бекітілген тәртіппен жүзеге асырылады. 10. Уәкілетті орган ТМККК қамтамасыз ету және кеңейту жөніндегі іс-шараларды іске асыру шеңберінде ағымдағы нысаналы трансферттерді тиімді пайдалануды үйлестіруді және мониторингтеуді жүзеге асырады. 11. Дәрілік заттарды сатып алу Қазақстан Республикасы Үкіметінің 2009 жылғы 30 қазандағы № 1729 қаулысына сәйкес жүзеге асырылады. Облыстардың, Астана және Алматы қалаларының денсаулық сақтауды мемлекеттік басқарудың жергілікті органдары жүзеге асыратын жүректің ишемиялық ауруы, артериялық гипертензия, жүрек функциясының созылмалы жетіспеушілігі, аритмия, пневмония, өкпенің созылмалы обструктивтік ауруы, асқазан мен ұлтабардың ойық жарасы ауруларымен ауыратын тұрғындарды амбулаториялық деңгейде дәрілік заттар мен медициналық мақсаттағы бұйымдарды қоспағанда, осы Қағидалардың 5-тармағының 6) тармақшасында көрсетілген Қазақстан Республикасының Үкіметі айқындайтын дәрiлiк заттарды сатып алуды ұйымдастырушы дәрілік заттарды, медициналық мақсаттағы бұйымдарды сатып алу және олармен қамтамасыз ету жөніндегі бірыңғай дистрибьютор болып табылады. 12. Облыстардың, Астана және Алматы қалаларының әкімдері ТМККК-ны қамтамасыз ету және кеңейту жөніндегі іс-шараларды іске асыру шеңберінде: 1) осы Қағидаларға 5-тармақта көрсетілген іс-шаралар өткізуді; 2) «Бекітілген халық тіркелімі» порталында (бұдан әрі – «БХТ» порталы) өңір халқы бойынша, оның ішінде бюджетті қалыптастыру үшін деректердің дұрыстығы мен дәйектілігін және оларды Қазақстан Республикасы Денсаулық сақтау министрінің міндетін атқарушының 2011 жылғы 5 қаңтардағы № 7 бұйрығымен айқындалған тәртіппен өзектендіруді; 3) «Амбулаториялық-емханалық көмек»; «Ауылдық денсаулық сақтау»; «Стационарлық науқастардың электрондық тіркелімі»; «Жан басына шаққандағы нормативтің қосымша компоненті»; «Онкологиялық науқастардың электрондық тіркелімі» ақпараттық жүйелеріне денсаулық сақтау субъектілері енгізген өңір халқына көрсетілген қызметтер бойынша деректердің дұрыстығы мен дәйектілігін; 4) МСАК көрсететін денсаулық сақтау субъектілері қызметінің түпкілікті нәтижелеріне қол жеткізгені үшін ТМККК шеңберінде Ақы төлеу қағидаларымен «Тегін медициналық көмектің кепілдік берілген көлемі шеңберіңде көрсетілген медициналық қызметтер үшін ақы төлеу қағидаларын бекіту туралы» Қазақстан Республикасы Денсаулық сақтау министрінің 2014 жылғы 17 ақпандағы № 97 бұйрығымен айқындалған тәртіппен ЖНЫК төлеуді; 5) «Қаржы лизингі шарттарында сатып алынған медициналық техника үшін тегін медициналық көмектің кепілдік берілген көлемін көрсететін денсаулық сақтау ұйымдарына лизинг төлемдерін есептеу әдістемесін және төлеу тәртібін бекіту туралы» Қазақстан Республикасы Денсаулық сақтау министрінің 2014 жылғы 12 желтоқсандағы № 322 бұйрығында айқындалған тәртіппен қаржы лизингі шартында сатып алынған медициналық техниканы пайдалана отырып, көрсетілген медициналық қызметтер үшін лизинг төлемерін төлеуді; 6) уәкілетті органмен ТМККК-ні қамтамасыз етуге және кеңейтуге ағымдағы нысаналы трансферттер бойынша тікелей және түпкілікті нәтижелердің көрсеткіштерін келісуді; 7) уәкілетті органмен келісу бойынша айқындалған ТМККК-ні қамтамасыз етуге және кеңейтуге нысаналы ағымдағы трансферттер бойынша тікелей және түпкілікті нәтижелерге қол жеткізуді; 8) амбулаториялық деңгейде дәрілік заттармен және медициналық мақсаттағы бұйымдарды қамтамасыз етілетін науқастардың электрондық тіркелімдерін қалыптастыруды; 9) республикалық бюджеттен берілетін ағымдағы нысаналы трансферттердің есебінен сатып алынатын дәрілік заттардың және медициналық мақсаттағы бұйымдардың пайдаланылуына мониторинг жүргізуді; 10) жүректің ишемиялық ауруы, артериялық гипертензия, жүрек функциясының созылмалы жетіспеушілігі, аритмия, пневмония, өкпенің созылмалы обструктивтік ауруы, асқазанның және ұлтабардың ойық жарасы аурулары бойынша халықтың жекелеген санаттарына дәрілік заттарды және медициналық мақсаттағы бұйымдарды сатып алуға жергілікті бюджеттен республикалық бюджеттен ағымдағы нысаналы трансферттерден бөлінетін қаражатқа тең мөлшерде қаражат бөлуді қамтамасыз етеді. 4. Жергілікті деңгейде медициналық денсаулық сақтау ұйымдарын материалдық-техникалық жарақтандыруға республикалық бюджеттен берілетін ағымдағы нысаналы трансферттерді пайдалану тәртібі 13. Облыстық бюджеттерге, Астана және Алматы қалаларының бюджеттеріне жергілікті деңгейде денсаулық сақтау ұйымдарын материалдық-техникалық жарақтандыруға берілетін ағымдағы нысаналы трансферттер медициналық техниканы, медициналық емес жабдықтарды, медициналық мақсаттағы бұйымдарды сатып алуға пайдаланылады. 14. Уәкілетті орган облыстардың, Астана және Алматы қалаларының денсаулық сақтауды мемлекеттік басқарудың жергілікті органдарымен келісу бойынша «Денсаулық сақтаудың мемлекеттік ұйымдарын медициналық техника және медициналық мақсаттағы бұйымдармен жарақтандырудың минимальды стандарттарын (нормативтерін) бекіту туралы» Қазақстан Республикасы Денсаулық сақтау министрінің 2010 жылғы 27 қазандағы № 850 бұйрығымен бекітілген мемлекеттік денсаулық сақтау ұйымдарын медициналық техникамен және медициналық мақсаттағы бұйымдармен жарақтандырудың ең төменгі стандарттарына (нормативтерге) сәйкес жергілікті деңгейде денсаулық сақтау ұйымдары үшін сатып алынатын медициналық техниканың, медициналық емес жабдықтың, сондай-ақ медициналық мақсаттағы бұйымдардың қажеттілігін әрбір өңір бойынша айқындайды. Жергілікті деңгейдегі денсаулық сақтау субъектілері үшін медициналық техникаға, медициналық емес жабдыққа, сондай-ақ медициналық мақсаттағы бұйымдарға қажеттіліктің негізінде уәкілетті орган ағымдағы нысаналы трансферттер сомасын пайдалану бағытын және медициналық ұйымдарды материалдық-техникалық жарақтандыруға облыстық бюджеттерге, Астана және Алматы қалаларының бюджеттеріне берілетін ағымдағы нысаналы трансферттердің шеңберінде сатып алынатын медициналық техниканың, медициналық емес жабдықтың, медициналық мақсаттағы бұйымдардың тізбесін айқындайды. 15. Медициналық емес жабдықты, медициналық мақсаттағы бұйымдарды сатып алуды ұйымдастыруды облыстардың, Астана және Алматы қалаларының денсаулық сақтауды мемлекеттік басқарудың жергілікті органдары мемлекеттік сатып алу туралы заңнамаға сәйкес, медициналық техниканы – Қазақстан Республикасының Үкіметі айқындаған заңды тұлға Қазақстан Республикасы Үкіметінің 2009 жылғы 30 қазандағы № 1729 қаулысына сәйкес уәкілетті орган айқындаған сомаларды пайдалану бағыты мен сатып алынатын медициналық техниканың, медициналық емес жабдықтың, медициналық мақсаттағы бұйымдардың тізбесі шеңберінде жүзеге асырады. 5. Нысаналы ағымдағы трансферттер бойынша қаражатты пайдалану, есептілік 16. Уәкілетті орган облыстық бюджеттерге, Астана және Алматы қалаларының бюджеттеріне төлемдер бойынша тиісті бюджеттік бағдарламаны қаржыландырудың жеке жоспарының негізінде нысаналы ағымдағы трансферттер аударуды жүргізеді. 17. Ағымдағы нысаналы трансферттерді пайдалану кезінде үнемдеу пайда болған жағдайда облыстың, республикалық маңызы бар қаланың, астананың жергілікті атқарушы органдары уәкілетті органмен келісу бойынша үнемдеу сомасын бюджеттік бағдарламалар нәтижелерінің көрсеткіштерін жақсартуға пайдаланады. 18. Қандай да бір облыс, Астана және Алматы қалалары бөлінген қаражатты толық игермеген жағдайда, уәкілетті орган заңнамада белгіленген тәртіппен Қазақстан Республикасының Үкіметіне нысаналы трансферттердің сомаларын облыстардың және Астана мен Алматы қалаларының арасында қайта бөлу туралы ұсыныс енгізеді. 19. Уәкілетті орган Қазақстан Республикасының бюджет заңнамасында белгіленген тәртіппен және мерзімде Қазақстан Республикасы Қаржы министрлігіне есептілік береді.