БАЛУАН БАБА АТЫНДАҒЫ САРАЙ АЗИАДАҒА ДАЙЫН

Мемлекет басшысы Нұрсұлтан Назарбаев Азия ойындары өткізілетін басты спорттық нысанның бірі – Балуан Шолақ атындағы Спорт сарайын аралап көрді. Жаңартылған, күрделі жөн­деу­ден өткізілген Спорт сарайы ең жоғары халықаралық стан­дарт­тарға сәйкес келеді. Мұнда спорт­шыларға, спортсүйер қауымға, сонымен қатар, қазақстандық Азиа­даны көрсететін бұқаралық ақ­парат құралдарына барлық жағ­дай жасалған. Қазірдің өзінде Спорт сарайында халықаралық фе­дерациялардың күнтізбесіне кі­ретін үлкен жарыстар өткізіліп жүр. Елбасы Спорт сарайына кел­генде оның алдындағы үлкен электрондық таблода Азиаданың басталуына 200 күн қалғаны жар­қы­рап жанып тұрған еді. Ал енді осы алып кешеннің аренасында тікелей қысқы ойындар кезінде, 2011 жылдың ақпанында әйел­дер­дің хоккей командалары жарыс медальдарын сарапқа салады. Мемлекет басшысының жа­нын­да Қазақстан Республикасы­ның Туризм және спорт министрі Темірхан Досмұхамбетов, Алматы қаласының әкімі Ахметжан Есі­мов және Спорт сарайының ди­рек­торы Юрий Захарин еріп жү­ріп, түсініктемелер берді. Өйт­ке­ні, Спорт сарайы бұрынғы өл­шем­дерінде қалды демесеңіз, бас­тан-аяқ жаңарып шыққан. 5 мың адамдық трибунаға қолайлы орын­дықтар қойылып, кең теле­экрандар, айрықша қажетті жа­рық кешеннің үлкен жарыс ал­дын­дағы салтанатын таныт­қан­дай. Мұнда жуырда ғана волей­болдан Қазақстан Президентінің кубогы жолындағы халықаралық турнир болып өткені де қаты­су­шы елдер туларының ілулі тұруы­нан танылғандай. Елорда күнінде жаңа спорт­тық ғимаратты Қазақстанның, Украинаның, Иран мен Тунистің ұлттық құрамалары, Ресей мен Қытайдың жетекші клубтары алғашқы болып сынақтан өткізді. Бес күн бойғы жарыстан соң мұнда спортшыларға жасалған жағдайға бәрі де таңданыстарын жасырмады. Спорт аренасында Елбасын турнирде алтын медальді жеңіп алған Қазақстан құрамасының волейболшы қыздары қарсы алып, Людмила Анарбаева, Сана Жарылғасова, Ирина Зайцева мен Наталья Рыкова аяқталған турнир туралы ойларымен бөлісті. Әңгіме арасында қыздардың “Нұр Отан” партиясына мүше болуға шешім қабылдағаны жайында да айтылды. – Қысқы ойындардың өт­кі­зілуі ел үшін айрықша сынақ. Ал енді мынау Спорт сарайы, жа­ңарған кешен алматылықтарға шынайы тарту болып қалады, – деді Елбасы. Қазірдің өзінде Қысқы Азия ойындарына әзірлігі 95 пайызға бағаланып отырған Спорт сарайы әлі де 10 мың шаршы метрге үл­кейеді, соның нәтижесінде қос­алқы ғимараттар – спорт зал­да­ры, киім шешетін орын, баспасөз орталығы, медициналық орындар, көптеген кафелер салынатын бо­лады. Бұл жерде шорт-трекке, хок­кейге, мәнерлеп сырғанауға арналған қосымша катоктар іске қосылады. Осылайша Алматыда үлкен халықаралық турнирлерді өткізуге барлық жағдай жасалады. Спорт сарайын реконструкция­лау­дың алғашқы кезеңіне мем­лекет тарапынан бөлінген 14,5 млрд. теңге игеріліпті. Волейбол турнирінің кезінде кешеннің бар­лық құрылымдары мен тетіктері сынақтан өткізілген. Ендігі сынақ 24-26 шілдеде болмақ – Балуан Шолақ атындағы Спорт сарайын­да дзюдодан Әлем кубогы жолын­дағы жарыс өтеді. Спорт сарайының әзірлігіне ризашылығын білдірген Елбасы мұнда Қысқы Азия ойындарының салтанатты жабылуы болатынын жеткізді. Бақыт БАЛҒАРИНА, Суретті түсіргендер С.БОНДАРЕНКО, Б.ОТАРБАЕВ.