Петропавлда «Қазақстанда жасалған» атты акция өтті

ПЕТРОПАВЛ. 27 ақпан. Петропавл қалалық әкімдігінің ұйымдастыруымен және «Ардис» азаматтық бастамаларды дамыту орталығының, «Қазақстан-2050» қоғамдық қозғалысы аумақтық филиалының қолдауымен «Қазақстанда жасалған» атты акция өтіп, ол 43 ірі кәсіпорынның сүйемелдеуіне ие болды. Бұл туралы қалалық әкімдіктің баспасөз қызметі хабарлады. Бастамашылдар тұрғындар мен сауда орындарында болып, отандық өнімдер мен тауарлар шығаратын жергілікті өндіріс орындары жайлы жан-жақты ақпарат топтастырылған түрлі-түсті буклеттер таратты. Мемлекеттік автоинспекция қызметкерлерімен бірлесіп, рейдтер жүргізу барысында «Жергілікті өнімдерді көптеп сатып алыңыздар!» деп ірі әріптермен айшықты етіп жазылған стикерлер жүргізушілерге үлестірілді. Автотұрақтарда тұрған көліктердің әйнекшелеріне жапсырылды. Әлеуметтік желілер арқылы «Солтүстік Қазақстанда жасалған» конкурсы ұйымдастырылып, түрлі сауалдар қойылды. Оның жеңімпаздары Наурыз мерекесі қарсаңында жарияланады. «СҚО студенттер альянсы» қозғалысының өкілдері «Мир» көшесінде орналасқан гипермаркетте болып, тұтынушылар арасында жергілікті және шетелдік азық-түлік өнімдері мен тауарлардың сапасына қатысты сауалдама жүргізді. Оның қорытындысы бойынша отандық өнімдерге деген сұраныстың көбейіп келе жатқаны байқалды. Басқа да сауда орындарын аралап, «Фрегат», «СБИ-Агро», «Леонтьев», «Казмясопродукт» секілді жергілікті тауар өндірушілердің өнімдерін алушылар қарасы мол екенін көз жеткізді. Өйткені, біріншіден, қоспасы жоқ, таза, екіншіден, баға қолжетімді. Өмір Есқали. Дерек: Петропавл қалалық әкімдігінің баспасөз қызметі. Сурет: bag.kz.