Солтүстік Қазақстанда «Полиция барысы-2015» турнирі басталды

ПЕТРОПАВЛ. 27 ақпан. Солтүстік Қазақстан облысындағы «Жеңіс» балалар және жасөспірімдер спорт мектебінде қазақ күресінен « Полиция барысы» турнирі басталды. Бұл туралы облыстық ішкі істер департаментінің баспасөз қызметі хабарлады. Турнирдің ашылуына облыс әкімінің орынбасары Анархан Дүйсенова, қала әкімі Марат Тасмағанбетов және күштік құрылымдар басшылары қатысты. Жарыс барысында облыстық ішкі істер департаментінің басшысы, генерал-майор Берік Біләлов спорт ардагері Бауыржан Құлжановқа «Қазақ күресі бойынша бірінші спорт шебері» белгісін салтанатты жағдайда тапсырды. «Тұңғыш рет ұйымдастырылып отырған жарысқа облыс орталығынан, аудандардан және қылмыстық атқару, төтенше жағдайлар жөніндегі департаменттер мен мамандандырылған күзет басқармасынан 34 палуан күш сынасып, «Полиция барысы-2015» атағын сарапқа салатын болады», дейді турнирді ұйымдастырушылар. Жеңімпаздар мен жүлдегерлер лайықты марапатталмақ. Ал «Полиция барысын» қомақты жүлде күтіп тұр. Өмір Есқали. Дереккөз: Солтүстік Қазақстан облыстық ішкі істер департаментінің баспасөз қызметі. Сурет: ogni.kz.