Лингвистикалық комиссияның құрамы бекітілді

Орталық сайлау комиссиясының төрағасы Қуандық Тұрғанқұловтың төрағалығымен өткен Комиссияның кешегі отырысында 2015 жылғы 26 сәуірге тағайындалған Қазақстан Республикасы Президентінің кезектен тыс сайлауын ұйымдастыру мен өткізуге қатысты төрт қаулы қабылданды. Атап айтқанда, Қазақ­стан Республикасының президент­тігіне кандидаттардың мемле­кеттік тілді еркін меңгергендігін анықтау жөніндегі лингвис­тикалық комиссия құру туралы шешім қабылданды және оның құрамы бекітілді. Комис­сия құрамында филология ғылымдарының докторлары Мыр­затай Жолдасбеков (төраға), Сейіт Қасқабасов, Фаузия Ораз­баева, Дихан Қамзабекұлы және Гүлтас Құрманбай бар. Комиссия мүшелерінің барлығы қазақ тілі мен қазақ әдебиетінің білгір мамандары. ОСК мүшесі Ләззат Сүлей­мен­нің атап өтуінше, Қазақстан Республикасының президент­тігіне кандидаттардың мемле­кеттік тілді еркін меңгергендігін анықтау рәсімі еш өзгерген жоқ, ол 2005 жылғы 31 тамыздағы «Қазақстан Республикасының президенттігіне кандидаттың мемлекеттік тілді еркін мең­гер­гендігін анықтау рәсімі туралы» Ортсайлаукомның қаулысымен айқындалады. Отырыста, сондай-ақ, Орт­сай­лауком Қазақстан Респуб­ликасының президенттігіне кандидатты қолдайтын сай­лау­шылардың дұрыс қолдарының саны кемінде 93 мың 012 қол­ды құрауы тиістігін бел­гіледі. Қолдарды жинауды сенім білдірген адамдар ұйым­дас­тырады. Қолдарды жинайтын топтардың саны мен мөлшері шектелмейді. Сонымен қатар,  Орталық сайлау комиссиясы қол қою парақтарын беру және Қазақстан Республикасының президенттігіне кандидатты қолдап жиналған қолдардың растығын тексеру мерзімдерін қысқарту туралы шешім қабылдады. Қол қою парақтарын Ортсайлауком кандидаттың Конституция мен «Қазақстан Республикасындағы сайлау туралы» Конституциялық заңда белгіленген талаптарға сәйкестігі тексерілгеннен кейін екі күнтізбелік күн ішінде береді. Бұған дейін бұл рәсімге бес күн жұмсалатын. Ал аумақтық сайлау комиссияларының кандидатты қолдап жиналған қолдардың растығын тексеру мерзімі күнтізбелік он күннен бес күнге дейін қысқартылды. Отырыста аталып өтілгендей, Ортсайлауком 2015 жылғы 26 сәуірге тағайындалған Қазақстан Республикасы Президентінің кезектен тыс сайлауында шетел­дік бұқаралық ақпарат құрал­дарының өкілдері, Қазақстан Рес­пуб­ликасы Сыртқы істер министрлігі берген аккредиттеу туралы куәлігі болған жағдай­да, сайлауды байқауды жүзеге асыруға құқылы екенін белгіледі. Бұл ретте халық­аралық байқаушыға, сондай-ақ шетелдік бұқаралық ақпарат құралының өкіліне жеке басын куәландыратын құжаты болған жағдайда, бір аудармашы ілесіп жүре алады. Аталған қаулымен халықаралық байқаушы сауалдамасының мәтіні бекітіліп, халықаралық байқаушыларды аккредиттеу 2015 жылғы 20 сәуірде аяқталатыны белгіленді. Отырысы аяқталған соң, Орталық сайлау комиссиясының бұқаралық ақпарат құралдарымен тиімді өзара іс-қимыл жасауын, оның қызметінің және сайлау үдерісінің барлық кезеңдерінің ашықтығын арттыруды, сондай-ақ, елдің сайлау заңнамасының ережелерін көпшілікке тарату мен түсіндіруде маңызды рөл атқаруды қамтамасыз етуге негізделген баспасөз орталығы ашылды. Орталық сайлау комис­сиясының баспасөз хатшысы Венера Жексембекова хабардар еткендей, баспасөз орталығында журналистердің жұмыс істеп, ақпарат алуларына барлық жағ­дай жасалған. Интернет, факс, телефон, тағы басқа да құрал­дармен жабдықталған. Баспасөз орталығының ал­ғаш­қы қонағы Лингвистикалық комиссияның төрағасы Мыр­затай Жолдасбеков болды. «Біз кезектен тыс прези­денттік сайлаудың алдында тұрмыз. Президенттік сайлау­дың өтуін саяси партиялар, қоғамдық ұйымдар, үкімет­т­ік емес ұйымдар, еңбек ұжым­дары, студенттер мен оқыту­шылар қолдады, – деді ол. – Елі­міздің Конституциясында көрсе­тілгендей, президенттіктен үміткерлер бірқатар талаптарға сай болуы керек. Олар бірнеше сынақтан өтеді. Соның бірі – болашақ президент мемлекеттік тілді еркін меңгеруі тиіс. Ал Комиссия тиісті заңнамалар шеңберінде жұмыс істейтін болады». Әлисұлтан ҚҰЛАНБАЙ, «Егемен Қазақстан». сурет: http://qamshy.kz