Мемлекет басшысы әлемдік экономика дәстүрлі сын-қатерлермен қатар цифрлық технологиялардың қарқынды дамуымен байланысты елеулі өзгерістер кезеңін бастан өткеріп жатқанын атап өтті. Оның айтуынша, жасанды интеллект жаһандық экономикалық дамудың негізгі факторларының біріне айналды.
«Біз жасанды интеллект технологияларының қарқынды дамуы жаһандық экономиканың іргелі факторына айналғанын көріп отырмыз», – деді Тоқаев.
Президент жасанды интеллектіні енгізу еңбек нарығында ауқымды өзгерістерге алып келетінін және бүкіл әлем бойынша миллиондаған адамды қайта даярлауды қажет ететінін айтты. Осы жағдайда Қазақстан ЕАЭО аясындағы интеграциялық үдерістерді дамыту үшін жасанды интеллект технологияларын белсендірек пайдалануды ұсынады.
«Мәселен, Халықаралық валюта қорының бағалауынша, алдағы жылдары жасанды интеллект технологияларын енгізуге байланысты әлемдік еңбек нарығында жұмыс орындарының шамамен 40%-ы қысқарады. Әрине, бұл әлемнің түкпір-түкпіріндегі жүздеген миллион адамды қайта оқытуды талап етеді», – деп атап өтті Мемлекет басшысы.
Тоқаев сондай-ақ 2026 жылдың Қазақстанда жасанды интеллект және цифрлық даму жылы болып жарияланғанын еске салды. Сонымен қатар, жеке деректерді қорғау мен азаматтардың цифрлық ортадағы қауіпсіздігіне ерекше назар аударылып отыр.
