АСТАНА. 28 наурыз. Бүкіләлемдік бокс сериясында «Астана арландары» 11-жеңістеріне қол жеткізді. Бүгін таңда Майами қаласында өткен «АҚШ нокаутшыларына» қарсы кездесуде «арландар» 5:0 есебімен басым түсті. Бұл туралы egemen.kz хабарлады.
«АҚШ нокаутшылары» – «Астана арландары» 0:5
49 кг: Джошуа Франко – Теміртас Жүсіпов 1:2 (48:47, 47:48, 47:48). 56 кг: Франциско Мартинес – Мейірболат Тойытов 0:3 (46:49, 46:49, 46:49). 64 кг: Тайрек Ирби – Самат Бәшенов 1:2 (46:49, 49:46, 47:48). 75 кг: Кэлвин Хендерсон – Мейірім Нұрсұлтанов 0:3 (46:49, 47:48, 46:49). 91 кг: Эдриан Тэйлор – Василий Левит 0:3 (46:49, 46:49, 45:49). Осы жеңісінен кейін біздің команда 33 ұпайға ие болды. Бұл көрсеткіш мерзімінен бұрын өз тобымызда («В») бірінші орын алуға мүмкіндік берді. Себебі, топта өкшемізді басып келе жатқан негізгі қарсыласымыз «Баку оттарының» еншісінде бүгінде 20 ұпай бар. Ал олар бұл сында әлі төрт кездесу өткізеді. Соның барлығында жеңіске жеткен күннің өзінде ең көбі 12 ұпай жинайтыны белгілі. Әзербайжандар енді көп дегенде 32 ұпай ғана олжалай алады. Яғни, қандай жағдай болсын біздің боксшыларды басып озатын еш мүмкіндіктері жоқ. Топтағы бірінші орынмен қатар «Астана арландары» жартылай финалға берілер жолдаманы да иемденгенін айта кетейік. Оған дейін топтық кезеңдегі үш кездесуі бар. Нақты айтар болсақ, Марат Жәкиевтің шәкірттері 11, 18, 25 сәуір күндері сәйкесінше, Пуэрто-Рико, Аргентина және Италия командаларына қарсы шаршы алаңға шығады. Еламан Қоңыр. Дерек: egemen.kz. Сурет: instagram.com.
