Еңлік-Кебек

кешенінің маңайы абаттандырылды Еліміздің рухани орталығы Семей шаһарынан қасиетті Абай жеріне баратын қасқа жолдың бойында тарихи ескерткіштер көп-ақ. Асықпай аралаған адам М.Әуезовтің әйгілі «Абай жолы» эпопеясын қайта парақтап шыққандай әсерде қалады. Сол ескерткіштердің бірі – «Еңлік-Кебек» кешені. Таяуда оның  басында махаббаттың қос мұңлығына арналған ескерткіш-мүсін мен демалыс үйі ашылып, Абайдың 170 жылдық мерейтойы аясында кешен маңайы абаттандырылып, көз тартатын көрікті кейіпке енді. Айналасы асфальтталған алаңға күн көзінен қалқалайтын күрке орнатылды. Сұлулықтың символына баланған елік бейнесімен бірге қойылған Еңлік пен Кебектің мүсінін жергілікті өнер иесі, Саржал ауылындағы Ш.Тоқжігітов атындағы орта мектептің мұғалімі Ертіс Тәтиев жасаған екен. – Шәкәрім Құдайбердіұлының «Жолсыз жаза» дастанында ғашықтардың бастан кешкендері әсерлі баяндалатынын білесіздер. Осы оқиға негізіне сүйене отырып, мүсінді балам екеуіміз бір жарым айда жасап шықтық. Қос мұңлықтың ішкі жан дүниесінің көрініс табуына назар аудардық. Махаббат құрбандарының жанына елікті қоюымыздың мәні бар. Өйткені, Кебек Еңлік сұлуға аң атып жүргенде кез болады. Бұл жұмыс облыс­тық мәслихат депутаты Тасболат Битеновтің қолдауымен жүзеге асты, – деді Ертіс Исайынұлы. «Нұрлы Жол» бағдарламасы аясында облыстық маңызы бар жолдарды жөндеу бағытында аудан әкімі Тұрсынғазы Мүсәпірбековтің бастамасымен жүзеге асқан тағы бір шаруа – кесенеге тағзым ете келген туристерге арналған қонақжай. Облыстық мәслихат депутаты, Семей қаласындағы «Ақшың» корпорациясының президенті Марат Құрманбай бұл кешенді ұлы Абайдың 170 жылдық тойына тарту ретінде жеке қаражатына салдырды. – Еліміздегі айтулы тарихи орындар­дың біріне саналатын Еңлік пен Кебек мазарының жанынан заманауи демалыс кешенінің ашылуы туристерге, қадірлі меймандарға өте қолайлы жағдай жасайды, – деді Қарауыл ауылынан келген Ботабек ақсақал. Кешеннің қабырғасына «Ұлы Абайға – 170 жыл» деп жазылған. Сондай-ақ мерейтой құрметіне салынған демалыс үйінің аумағы да 170 шаршы метрді құрайды. Семей, Абай мен Абыралы өңірлерінде халыққа, ел мен жер тарихына қатысты игі істерімен белгілі Марат Серікжанұлы ЮНЕСКО көлемінде тойланған ұлы Абайдың 150 жылдық мерей­тойына да айтулы үлес қосқан болатын. Думан АНАШ, «Егемен Қазақстан». Шығыс Қазақстан облысы, Абай ауданы.