Маңғыстауда 24 адам мінген автобус аударылып қалды

АҚТАУ. 29 наурыз. Маңғыстауда екпіні секундына 25 метрлік жылдамдықпен ұйытқи соққан шаңды дауылдың салдарынан мұнайшылар мінген автобус апатқа ұшырады. Бұл туралы egemen.kz тілшісі хабарлады. Оқиға бүгін таңертеңгі сағат 7 шамасында Ақтау-Жетібай-Жаңаөзен тасжолында болды. Шаңды дауылдан жол дұрыс көрінбеген. Құзырлы орындардың хабарлауынша,  жұмысшылар мінген Daewoo-BH 117 автобусы ауа райының қолайсыздығына байланысты жолдың оң жақ бетіне қарай аударылған. Автобустағы 24 адамның барлығы да Жетібай ауылындағы вахталық жұмыстарына бара жатқан «Техно-Трейдинг ЛТД» ЖШС-нің жұмысшылары болып шықты. Жол апаты салдарынан бір жолаушы түрлі дене жарақаттарын алып, облыстық ауруханаға, тағы үш жолаушы Жетібай ауылының ауруханасына жіберілген. Оқиғадан соң жол-патрульдік полициясы қызметкерлері аталған тасжолда тек өздерінің бастауымен, топ болып жүруге ғана рұқсат етіп жатыр. Гүлайым Шынтемірқызы. Дерек, сурет: egemen.kz.