САЯСИ БЕДЕЛІ ДЕ, ЭКОНОМИКАЛЫҚ ӘЛЕУЕТІ ДЕ ЖЕТЕДІ

Шағын сұхбат ЕҚЫҰ-ға мүше мемлекеттер сыртқы істер министрлерінің бейресми кездесуі аясында Ұйымның Іс басындағы төрағасы, Қазақстан Республикасының Мемлекеттік хатшысы – Сыртқы істер министрі Қанат Саудабаев Македония Сыртқы істер министрі Антонио Милошоскимен де кез­дес­кен-тін. Кездесуден соң біз Ма­кедония сыртқы саясат ведом­ствосының басшысына бірнеше сұрақ қойған едік. – Македония бүгінде Еуропа Кеңесіне төрағалық етеді, – деді Македония Сыртқы істер министрі Антонио Милошоски. – Қазақстан өз кезегінде ЕҚЫҰ-ға төрағалық етуде. Осы екі ұйымның өзара ын­ты­мақтастығы бүгінде де, бола­шақ­та да ерекше маңызды. – Ұйымның Іс басындағы төр­ағасымен кездесуде қандай мәсе­ле­лер әңгіме болды? – Кездесуде Қазақстан мен Македония арасындағы ынтымақ­тастықты нығайту мәселелері қоз­ғалды. Дәлірек айтқанда, өзара бай­ланыстарды жандандыру, қауіпсіз­дікті қамтамасыз ету, адам құқығын қорғау мәселелеріне баса назар аударылды. Сонымен қатар, Қазақ­стан Республикасы мен Македония арасындағы дипломатиялық төл­құжат иелерін визалық талаптардан босату туралы келісімге қол қойылды. – Биыл Қазақстанда ЕҚЫҰ саммитін өткізу бастамасы жөнінде не айтасыз? – ЕҚЫҰ саммиті өтпегелі 11 жыл­дан асты. Талқылауды қажет ететін, шешімін күткен проб­ле­ма­лар жеткілікті. Енді Ұйымға мүше 56 мемлекеттің басшылары бас қосып, қордаланған сол пробле­ма­ларды жан-жақты талқылап, олар­ды шешудің мезгілі жетті деп ойлаймын. – Қазақстанның ЕҚЫҰ-ға төрағалық еткеніне жарты жылдан асты. Пікіріңіз қандай? Қазақстан Ұйымға ойдағыдай басшылық жасап келеді. Ауқымды бағдарламалар дайындап, оны жү­зеге асыру үшін Ұйымға қатысушы елдерді жұмылдыру үстінде. Бүгінде Ұйым алдында тұрған өзекті мәсе­ленің бірі – Қырғызстанды саяси жағынан тұрақтан­дыру болып отыр. Бірінші кезекте бұл Ұйым төрағасы Қазақстанға, сондай-ақ Ұйымға мүше барлық мемлекеттерге үлкен жауапкершілік жүктейді. Ал Қазақ­станның бұл жауапкершілікті ойда­ғыдай орындауға саяси беделі де, экономикалық әлеуеті де жетеді.