Бақытжан Сағынтаев өзінің бір ісіне өкінетінін білдірді

АСТАНА. 29 наурыз. «Қазатомөнеркәсіп» ҰАК» акционерлік қоғамының басқарма төрағасы Нұрлан Қаппаровты ақтық сапарға шығарып салу сәтінде Үкімет басшысының бірінші орынбасары Бақытжан Сағынтаев марқұмның рухы алдында кешірім сұрайтынын жеткізді. Бұл туралы nur.kz хабарлады. Қаралы жиында Бақытжан Сағынтаев: «Осы таяуда өзімнің ойланбай жасаған әрекетім үшін Нұрланның рухы алдында кешірім сұраймын. Нұрлан экология министрлігінен кетіп, «Қазатомөнеркәсіп» АҚ-ты басқарып жүрсе де, «ЭКСПО-2017» директорлар кеңесінің төрағасы болатын. Ол Елбасының қабылдауына дайындалып жүрді. Өйткені, Қазақ ұлттық павильонының құрылымына жауапты еді. Біз Премьер-министрдің алдында арнайы роликті тамашаладық», – деді. Алайда, роликті көріп болған соң Сағынтаев бір ескертпесінің бар екендігін айтқан. «Нұрлан осыған байланысты жобасын қайта өңдеймін дегенше, 10 күн уақыты кетті. Қазір сол айтқан ескертпем үшін қатты өкінемін. Егер айтпағанымда, ол өз идеясымен және дайындаған ролигімен Елбасының қабылдауында болар еді. Мүмкін, жобасы мақұлданып, біз Нұрланның жасаған еңбегін көрер ме едік. Мен бұл роликтің Мемлекет басшысының қарауында болатыны жөнінде Нұрланның рухы алдында уәде етемін. Өйткені, ол өзінің осы жобасына бар ынтасымен кіріскен болатын», – деді Сағынтаев. Айта кетейік, марқұм Алматыдағы Кеңсай зиратына жерленді. Жолдыбай Базар. Дерек, сурет: nur.kz.