Өзбекстанда сайлаушылардың 91 пайызы сайлауға қатысты

АСТАНА. 30 наурыз. Өзбекстанда Орталық сайлау комиссиясының мәліметі бойынша, сайлаушылардың президент сайлауына қатысу деңгейі 91,01 пайыз болған. Бұл туралы UZ 24 хабарлады. Орталық сайлау комиссиясының төрағасы Мирза-Улугбек Абдусаломовтың кеше, 29 наурыз күні кешке өткізген брифингінде хабарлауынша, елдегі 20,798 млн. сайлаушыдан 18,928 млн. адам немесе жалпы сайлаушылардың 91,01 пайызы дауыс берген. Дауыс санау сағат 20:00-да басталды. Алдын ала қорытынды бүгін жергілікті уақыт бойынша сағат 16:00-де жарияланады. Абдусаломов сондай-ақ дауыс берудің Өзбекстаннның Еуропа мен АҚШ-тағы елшіліктерінде де жүріп жатқанын мәлімдеді. Алдын ала мәлімет бойынша, сайлау барысында әлдеқандай бір сайлау заңнамасының бұзылушылығы туралы шағым түспеген. Өзбекстанда президент сайлауы 29 наурыз күні жергілікті уақыт бойынша 6:00 сағатта барлық 14 сайлау округі бойынша басталды. Сайлау учаскелері Ташкент уақытымен 20:00 сағатта жабылды. Мұрат Айтқожа.