Атыраулықтар «Тайқазанды» 60-қа жуық ізгі іспен толықтырды

АТЫРАУ. 30 наурыз. Атырау облысының жұртшылығы «Қазақстан халқы Ассамблеясы – 20 игі іс» республикалық эстафетасының символы «Тайқазанды» қошеметпен қарсы алып, көршілес Батыс Қазақстан облысының делегациясына табыстады. Бұл туралы еgemen.kz тілшісі хабарлады. Атырау облысы әкімінің орынбасары Шыңғыс Мұқанның айтуынша, «Тайқазан» бірнеше күн бойы жаңа игі істерге толықты. Облыста 60-қа жуық қайырымдылық шарасы өтіп, шамамен 7 миллион теңге қаражат жиналды. Сөйтіп, Ұлы Отан соғысының ардагерлері мен қаза тапқандардың отбасыларына, аз қамтылған және көп балалы жанұяларға әлеуметтік көмек берілді. Аталған шара сенбіде Құрманғазы атындағы мәдениет үйінде «Шексіз талант» қайырымдылық концертімен жалғасын тапты. Оған өңірдегі этномәдени бірлестіктердің мүшелері, сондай-ақ, мүмкіндігі шектеулі болса да өнерді жанына серік еткен жандар белсене атсалысты. Мүмкіндігі шектеулі жандарға мұнайшылар атынан сый-сияпат көрсетілді. «Тайқазан» Қазақстандағы татулық пен бірліктің, ынтымақ пен берекелі тірліктің насихатшысына айналды» деді облыс әкімінің орынбасары Шыңғыс Мұқан. Жолдасбек Шөпеғұл. Дерек: egemen.kz. Сурет: Рахым Қойлыбаев.