ЖАС СУРЕТШІЛЕР ОДАҒЫ ҚҰРЫЛДЫ

Астана қаласының Суретшілер одағы Есіл ауданы әкімдігінің қолдауымен  Сауран көшесінде орналасқан экс­позиция залында көрме өткізді. Көрмеге елордамыздың белсенді өнер қай­рат­керлері атсалысып, үздік туын­ды­ла­рын көрермендер назарына ұсынды. Мысалы, К. Муллашев, Е.Айтуаров, А. Ди­никеев, Қ. Ахметжан және т.б. суретшілердің шығармалары қойылды. К.Муллашевтің “Биші Эльмира”, “Ақын Сара”, “Қыпшақ қызы”, “Махаббат аурасы” атты туындыларында қазақтың хас сұлулары көркемдігімен таңқалдырды. Ком­позициялық құрылымы кәсіби деңгейде орындалған және түстері бір-бірімен жақсы үйлесімділік тапқан суретші А. Диникеевтің “Дала аңшысы”, “Аңшы”, “Қыз алып қашу” сияқты туын­дыларынан ұсақ ою-өрнектер ізін анық байқауға болады. Шығармаларында кеңістік көкжиегі белгіленбеген,  кілем тәріздес, өте декоративті кескіндеме болып келетіні сүйсінтеді. Қ. Ахметжан әлі де шығармашылық ізденісте, оның “Орман әуендері” туындысының орындалуы ХХ ғасырдағы атақты француз суретшісі Сераның пуантилизм тәсіліне ұқсайды. Дегенмен, өзгешелігін аңғаруға болады. Мысалы Серада әрбір кенепке салынған түстің нүктелері бір-бірімен келісіп, біртұтас болып көрінсе, Қ.Ахметжанның туындысында түстік жағымдары ірірек және олардың қою қоңыр түсті жан-жағында контурлары бар. Кескіндемеші К.Хайбуллин “Самал жел” шығар­масында қаланың сыртында жасыл шалғында Президентіміз Н.Ә. Назарбаевтың демалып отырған шағын бейнелеген. Қазақтың кең даласында Елбасы туған жері үшін мақтаныш сезімінде отырғаны жайдары жүзінен көрінер еді. Суретші мұнда тұлға бейнесін самал желдің әуенімен үйлестіре жеткізуге тырысқан. Тағы бір айта кететін үлкен жаңалық – Астана  қаласының Сурет­шілер одағы жанынан “Жас суретшілер одағы” құрылды. Оны суретші Гүлмира Телғазиева басқарады. Қазақстанның түкпір-түкпірінен келген талантты жастар шығармашылық  жұмыстарымен жақында өздерінің алғашқы көрмесін ашты. Бейнелеу өнерінің шеберлері К.Муллашев, А. Назарқұлов, А. Айтуаров, Қ. Нұрбатыров пен Сурет­шілер одағының төрағасы Қоңыр Абдуллаұлы іріктеу конкурсын жүргізіп, 19 суретшінің арасынан 17 талапкерді мүшелікке қабылдады. Қазіргі кезде дарынды жастар көшедегі ескі үйлерді монументалды кескін­демемен безен­діруді ойластырып жатыр. Осы жоба бойынша қызу жұмыс жүруде. Сонымен қатар, “Сарыарқа” сауда орталығының көрме залында жастардың шығар­машылығы әрдайым жұрт­шылыққа ұсынылып отыратын болады. Жас суретшілерді одаққа қабылдау рәсімі, оларға куәлік тапсыру шарасы Ұлттық кітапхананың көрме залында салтанатты түрде  өтпек. Айгерім МӘЖИТХАНҚЫЗЫ, өнертанушы.