Елбасы Еркін экономикалық қоғамдастықтың медалімен марапатталды

АСТАНА. 30 маусым. Мемлекет басшысы Еркін экономикалық қоғамдастықтың Үлкен алтын медалімен марапатталды. Бұл туралы «ҚазАқпарат» хабарлады. Мәскеуде Ресейдегі Қазақстан елшілігінде Қазақстан Республикасының Президенті Нұрсұлтан Назарбаевты «әлемдік экономиканың дамуына, тарихи маңызды бастамалары мен интеграциялық үрдістердің құрылуы және оны жетілдіру салаларындағы жоғары жетістіктері, Еуразиялық экономикалық одақтың дамуы, Ресей Федерациясы мен Қазақстан Республикасы арасындағы экономикалық, ғылыми, мәдени байланысты нығайтуға қосқан үлесі және белсенді қоғамдық қызметі үшін» Еркін экономикалық қоғамдастықтың (ЕЭҚ) Үлкен алтын медалімен марапаттау рәсімі өтті. Шараға елшіліктің қызметкерлері мен БАҚ өкілдері қатысты. Марапатты ұсынған Еркін экономикалық қоғамдастықтың басшысы, Ресейдің белгілі экономисі, Мәскеудің бірінші мэрі (1991-1992) Гавриил Попов Нұрсұлтан Назарбаевтың Ресей ЕЭҚ Үлкен алтын медаліне ие болған алғашқы шетелдік азамат екенін атап өтті. Өз кезегінде медальді қабылдаған Ресейдегі Қазақстанның төтенше және өкілетті елшісі Марат Тәжин Г.Поповқа Елбасының экономика ғылымындағы қызметіне жоғары баға бергені үшін алғыс айтты. М.Тәжин атап өткендей, бұл марапат жай құрмет көрсету ғана емес, Нұрсұлтан Назарбаевтың еуразиялық диалогтың нығаюына, Ресеймен тату көршілес қатынастардың дамуына қосқан аса зор ғылыми және тәжірибелік үлесін мойындау. Еламан Қоңыр. Дерек, сурет: «ҚазАқпарат».