Ақтөбеде үздік қызметкерлерге пәтер берілді

АҚТӨБЕ. 30 маусым. Ақтөбедегі Тахауи Ахтанов атындағы облыстық драма театрында Мемлекеттік қызмет істері және сыбайлас жемқорлыққа қарсы іс-қимыл агенттігінің Ақтөбе облысы бойынша департаменті ұжымының ұйымдастыруымен мемлекеттік қызметкерлер күні атап өтілді. Оған облыс әкімдігі аппаратының өкілдері, жергілікті және аймақтық атқарушы органдардың басшылары, сондай-ақ, мемлекеттік қызмет саласының ардагерлері қатысты. Бұл туралы egemen.kz тілшісі хабарлады. Салтанатты шарада аталған департамент басшысы Қайрат Сөнтаев мемлекеттік қызмет саласындағыларды кәсіби мерекемен құттықтады. Шара барысында мемлекеттік қызмет саласындағы үлгілі еңбегі үшін 5 мемлекеттік қызметкер Мемлекеттік қызмет істері және сыбайлас жемқорлыққа қарсы іс-қимыл агенттігінің «Үздік мемлекеттік қызметкер» арнайы төсбелгісімен марапатталды, 2 қызметкерге қызметтік пәтерлердің кілті табыс етілді. Сондай-ақ, тағы 2 мемлекеттік қызметкердің омырауына Президент Нұрсұлтан Назарбаевтың Жарлығына сәйкес «Қазақстан халқы ассамблеясына 20 жыл» мерекелік медалі тағылды. Сонымен қатар, сахна төріне орнатылған ЛЭД-экраннан жиналғандар департаменттің имидждік фильмі мен «Біз жемқорлыққа қарсымыз!» атты әлеуметтік бейнесюжетті тамашалады. Шара соңында жас мемлекеттік қызметкерлер «Мемлекеттік қызмет туралы» Заңына сәйкес ант қабылдады. Мереке соңы концерттік бағдарламаға ұласты. Сатыбалды Сәуірбай. Дерек, сурет: egemen.kz.