Жапонияда жарты ғасырда болмаған нөсер жаңбыр жауды

АСТАНА. 30 маусым. Жапонияның оңтүстігінде соңғы 50 жылда болмаған нөсер жаңбыр жауды. Синоптиктердің болжамы бойынша, нөсер 1 шілдеге дейін толастамайды. Бұл туралы РИА «Новости» хабарлады. Жауынның күштілігі жағынан рекордтық нөсер күні кеше Жапонияның Токуносима аралында да тіркелген. Аймақта қазір дауыл туралы ескерту жасалып, Наканосима аралының тұрғындары қауіпсіз жерге көшірілуде. Метеорологтардың мәліметтеріне қарағанда, бірқатар аймақта жауын-шашынның түсу жылдамдығы сағатына 92 миллиметрге дейін жеткен. Жергілікті NHK телеарнасының хабарлауынша, Тосима елді мекенінде үш сағаттың ішінде 160 миллиметрге жуық жауын жауған. Синоптиктер нөсер жаңбыр сәрсенбіге дейін жалғасады деп болжап отыр. Кюсю және Наканосима аралдарында 1 шілде таңға дейін тағы да 200 миллиметрге дейін жауын жаууы мүмкін. Мамандар жылғалардан су тасу мен жар көшкіні қаупінің артқаны туралы ескетуде. Сондай-ақ, найзағай ойнап, дауыл күшеюі ықтимал. Бір айта кетерлігі, күштілігі жағынан рекордтық көрсеткішке жеткен мұндай қатты нөсер бұл елде соңғы 50 жыл бойы тіркелмеген. Еламан Қоңыр. Дерек: РИА «Новости». Сурет: gazeta.ru.