ПАВЛОДАР. 30 маусым. Облыста өңіраралық ынтымақтастық байланысты нығайту мақсатында Маңғыстау облысының делегациясы болып қайтты. Бұл туралы egemen.kz тілшісі хабарлады.
Мұның алдында Павлодар облысы Маңғыстауға барып, келісімдерге қол қойып қайтқан еді. Ендігі кезекте облыс орталығында екі өңірдің кәсіпкерлері кездесіп, сауда - экономикалық жиын өткізді.
Облыс орталығындағы ірі өндіріс орындарын аралап, олардың шығаратын өнімдерімен танысты. Сөйтіп, «Маңғыстау жеміс-көкөніс терминалы» ЖШС-не Павлодар облысының кәсіпкерлері күзге дейін 100 000 тонна картоп, 50 000 тонна көкөніс (сәбіз, қырыққабат) жеткізу жайында құжаттарды рәсімдеді.
Келісім-шарттың жалпы құны - 7,5 млрд. теңге. Ақтау теңіз портына өнім тасымалдау ел экономикасының дамуына осылай үлес қоспақшы. Маңғыстаулықтар да Павлодар облысына өз өнімдерін, құрылысқа қажетті материалдарын жеткізбекші. Ал, биыл жаз айларында маңғыстаулық 100 бала Баянауылдағы «Қарлығаш» балалар сауықтыру лагерінде демалады.
Облысқа екі күндік іс-сапардың жалғасы Естай атындағы мәденет сарайында «Құрмет» орденінің иегері, әнші Тамара Асардың қатысуымен өткен гала-концертпен аяқталды.
Фарида Бықай.
Дерек, сурет: egemen.kz
