АСТАНА. 30 маусым. Қаладағы білім ордасының қара шаңырағы саналатын Қорқыт ата атындағы Қызылорда мемлекеттік университетінің бітіруші түлектері диплом алып, жаңа өмірге қанат қақты. Бұл туралы Қорқыт ата атындағы ҚМУ-нің баспасөз қызметі хабарлады.
Диплом тапсыру салтанатына облысы әкімінің орынбасары Рауан Кенжеханұлы мен Қазақстан Республикасы Парламенті Сенатының депутаты Мұрат Бақтиярұлы және «Нұр Отан» партиясының Қызылорда облыстық филиалы төрағасының бірінші орынбасары Наурызбай Байқадамов, «Абзал және К» толық серіктестігінің директоры, Қазақстанның Еңбек Ері Абзал Ералиев қатысты. Сондай-ақ, университет ректоры, техника ғылымдарының докторы, профессор Қылышбай Алдабергенұлы Бисенов барша қауымды мерекемен құттықтай отырып, түлектерге ыстық лебізін білдірді. Ректор өз сөзінде: «Біздің мыңдаған түлектеріміз университетте алған білімдері мен кәсіби біліктіліктерінің нәтижесінде еліміздің әлеуметтік-экономикалық дамуына елеулі еңбек сіңіріп, табысты қызмет жасауда. Бұл – біз үшін үлкен мақтаныш. Біздің түлектеріміздің қатарында есімдері елге танымал қоғам қайраткерлері, мемлекеттік сыйлықтың лауреаттары, Қазақстанның Еңбек Ері атағының иегерлері, белгілі ғалымдар мен ұстаздар, даңқты спортшылар да бар. Сіздердің алдарыңызда тұрған ең басты міндет – университеттен алған білімдеріңізді тәжірибемен ұштастыра отырып, еңбек нарығында бәсекелестік қабілеті жоғары кәсіби тұлға болу», – деп ерекше атап өтті. Сонымен бірге, университет басшысы үлкен өмірге қанат қағып отырған әрбір түлектің еліміздің рухани-мәдени, экономикалық-әлеуметтік өсіп-өркендеуіне өзіндік үлес қосатындарына сенім білдірді. Сонымен өз кезегінде облыс әкімінің орынбасары мен келген қонақтар бітіруші түлектерге салтанатты түрде диплом табыстады.
Айта кетейік, университеттің 78 жылдық тарихы бар. Бүгінде білім беру қызметінде өзіндік дәстүрі қалыптасқан, республикалық, халықаралық білім кеңістігінде кеңінен танылған, ілім мен ғылымның, мәдениет пен өнердің қарашаңырағы. Университет институционалдық және арнайы мамандандырылған аккредиттеуден, мемлекеттік аттестаттаудан өткен аймақтағы іргелі оқу орны. Мұнда Елбасы тапсырмасына сай нарықтың өзгермелі жағдайына бейімделген, бәсекеге қабілетті, кәсіби білікті мамандар даярлау бағытында 2012-2013 оқу жылынан бастап бакалавриаттың 16 мамандығы оқу үдерісін көптілді білім беру жүйесі бойынша жүзеге асырып келеді.
Ең бастысы үш тілді еркін меңгеру арқылы академиялық ұтқырлық, қос диплом бағдарламалары аясында университеттің 50-ге жуық студенттері мен магистранттары Америка Құрама Штаты, Түркия, Австрия, Оңтүстік Корея, Польша, Египеттің жоғары оқу орындарында білімдерін жетілдіріп келді.
Жалпы, биылғы оқу жылында университетті 48 мамандық бойынша 1429 студент бітірді. Ал 296 түлек үздік диплом иегері атанды. Сонымен қатар, магистратураның 29 мамандығы бойынша кадрлар даярлайтын оқу орнынан биыл 163 бітіруші ғылым магистрі дәрежесін алды.
Салтанатты жиын барысында университеттің әр жылдардағы түлектері, халықаралық, республикалық ән байқауларының жеңімпаздары «Тұран» триосы, Индира Ахметова, Назерке Нұрадинова және қазақ эстрадасының жас жұлдызы, жерлесіміз Серік Ибрагимов әннен шашу шашып, жастарға ерекше көңіл-күй сыйлады.
Талғат Райымбек.
Дерек, сурет: Қорқыт ата атындағы ҚМУ-нің баспасөз қызметі.
