Отандық бизнестің өрісі кең

Кеше Астанада «Нұр Отан» партиясы жанындағы Кәсіпкерлікті қолдау жөніндегі республикалық қоғамдық кеңестің алғашқы отырысы өтті. Оған «Нұр Отан» партиясы Төрағасының бірінші орынбасары Бауыржан Байбек, Парламент депутаттары және бизнес өкілдері қатысты. Жиынды ашқан Бауыржан Байбек өзінің кіріспе сөзінде «Нұр Отан» партиясы жанындағы «Шағын және орта кәсіпкерлікті қолдау» бойынша сарапшылар тобы енді Кәсіпкерлікті қолдау жөніндегі республикалық қоғамдық кеңеске айналғанына тоқталды. Оның айтуынша, отандық бизнестің бәсекеге қабілеттілігін арттыру бағытындағы тұжырымдамалық ұсыныстарды әзірлеу және «Нұр Отан» партиясының, Ұлттық кәсіпкерлер палатасының, бизнестің, қоғамдық бірлестіктер мен мемлекеттік органдардың күш-жігерін біріктіру аталған кеңестің басты міндеті болмақ.Бұдан бөлек, ол бизнестің ел да­муындағы ерекше рөліне көңіл аударды. – Бизнес экономикалық дамудың қозғаушы күші, инновацияның негізгі бастаушысы болып табылады. Бизнес орта таптың негізі мен азаматтық қоғамның тірегі бола отырып, жұмыспен қамту бойынша маңызды әлеуметтік миссияны атқарады. Сондықтан, «Нұр Отан» отандық бизнесті жан-жақты қолдайды. Біздің мақсатымыз – отандық бизнес пен кәсіпкерлік рухты күшейтуге ықпал ету, ұлттық бизнес үшін қолайлы жағдай жасау, сол арқылы экономиканы дамыту, – деді Бауыржан Байбек. Оның сөзіне қарағанда, еліміздің ЕАЭО мен ДСҰ интеграциялық бірлес­тік­теріне кіру қарсаңында отандық бизнес үшін жағдайлар түбегейлі өзгерген. Бірігудің арқасында қазақстандық кәсіпкерлерге ЕАЭО-ның, одан бөлек, ДСҰ-ға мүше 160 елдің нарығы ашылды. Алайда, ішкі нарықтың ашылуымен бәсекелестік күшеюде, бұл отандық бизнес үшін күрделі сынақ болып отыр. Сондай-ақ, Б.Байбек партияның жекеменшікке қол сұқпауды, ашық бәсекелестікті, қолайлы инвестициялық ахуал құруды, өңірлердің үйлестірілген дамуын, инновация мен экспортты ынталандыруды, экономиканы әртараптандыруды, инфрақұрылымды дамытуды жақтайтынын жеткізді. Бұған қоса, отырыс барысында Б.Байбек қазіргі таңда Мемлекет басшысы саясатының арқасында елімізде кәсіпкерлік үшін жүйелі жағдайлар жасалғанына назар аударды. – «Нұр Отан» партиясының съе­зінде Елбасы бастамашы болған бес халықтық реформа бизнестің дамуы мен Қазақстанның әлемдегі ең дамыған 30 елдің қатарына қосылуы үшін инсти­туттық жағдай туғызуға бағытталған, – деді Б.Байбек. Сонымен бірге, Б.Байбек мемлекеттік аппараттың, бизнес пен қоғамның сенімді әрі өзара тығыз әрекеті кез келген сын-тегеурінге төтеп беруге мүмкіндік бере­тінін атап өтті. Жиында сөз сөйлеген Мәжіліс депутаттары Айгүл Соловьева, Шалатай Мырзахметов және басқалар Мемлекет басшысының сарабдал саясаты шағын және орта кәсіпкерліктің дамуына қолай­лы жағдай жасап беріп отырғанын, бес институттық реформаны жүзеге асыру ел дамуының басты кепілі бола алатынын жеткізді. Айта кетейік, партия жанындағы Кәсіпкерлікті қолдау жөніндегі респуб­ликалық қоғамдық кеңеске Мәжіліс депутаты Айгүл Соловьева басшылық ететін болды. Ол бұған дейін «Шағын және орта кәсіпкерлікті қолдау» бойынша сарапшылар тобына жетекшілік етіп келген-ді. Ал аталған кеңестің құрамына Парламент депутаттары, Ұлттық кәсіпкерлер палатасының, бизнес-қоғамдастықтың, мемлекеттік органдардың өкілдері және белгілі сарапшылар кірді. Жолдыбай БАЗАР, «Егемен Қазақстан».