Ерлер ауруы меңдеп тұр

Бұл көбіне урологиялық кеселдерге қатысты түйткілді мәселеге алып келуде «Ерлердің денсаулығы» жобасы аясында «Б.Жарбо­сы­нов атындағы урология ғылыми орталығы» АҚ басқармасының төрағасы Мырзакәрім Алшынбаев бастаған бір топ маман Қызылжар өңірінде екі күн болып, ер-азаматтардың денсаулығын тексерді. Білікті дәрігерлердің көмегіне 150 адам жүгініп, түрлі медициналық кеңестер алды. Еліміздің бас урологы облыс орталығында өткізген семинар-кеңесте бағдарламаның 10 жыл­дан бері жүзеге асып келе жатқанын айта келіп, әйелдерге қарағанда, ерлердің көп ауыратынын былай түсіндірді: – Басты себебі, өз денсау­­­лы­­­­­ғына салғырт, немқұрайды қарау. Дәрігерге көрінуге, скринингтік тексе­рілуден өтуге құлықтық та­ныта бермейді. Соның салда­ры­­нан түрлі ауруларға жиі шалды­­­ғып, еліміздегі орташа өмір сүру ұзақ­тығына кері әсерін тигізіп отыр. «Кардиология және ішкі ауру­лар» ғылыми-зерттеу институ­ты­ның директоры Сәлім Беркін­баев жүрек-қан тамырлары ауру­лары арасында да ерлердің үлесі басым екенін жеткізді. Қазақ­стан­ның алдын алу медицинасы акаде­мия­сының академигі Михаил Зельцер ерлердің психологиясын өзгерту бағы­тында ауқымды жұмыс­тар атқару қажеттігін тілге тиек етті. Олардың пікірінше, ер адам денсаулығы сыр беріп, жүрегі ауырса, қан қысымы өзгерсе, кардиологқа, терапевтке қаралып, ал урологқа баруды қажетсін­бей­ді. Өйткені, жоғарыдай созыл­малы аурулардың урологиялық дертке де байланыстылығын біле бермейді. Жер-жерлерде құрылған «Ерлердің денсаулық мектебі» шеңберінде өткізілген көшпелі семинарларда кешенді емделу, созылмалы кеселдерден сақтану жолдары кеңінен әңгімелетіні сондықтан. Статистикалық деректер бо­йынша соңғы 5 жылда кеуде обы­рына қарағанда, простатит рагы­на шалдығушылардың саны 2 есе өсіп, әлеуметтік дертке айналған. Солтүстік Қазақстан облысында әр бес науқастың бірі простатитпен ауырады. Бұл көрсеткіш Маңғыстау облысында 54 пайызға жетеғабыл. Қызылорда, Шығыс Қазақстан өңірлерінде де жағдай дабыл қағарлық. Облыста бұл жайт көңіл көншітерлік болғанымен, ше­шімін табатын мәселелер жоқ емес. Урологиялық кеселдердің жастар арасында меңдеп бара жатқаны, 20-30 жастағылардың 30 ­пайыздайында еркектік ағза­сында ауытқушылық бары қатты алаңдатады. Білікті дәрігерлер ерлер ден­сау­лығына экологияның на­шар­лауы, ауыз судың сапасыз­дығы үлкен зиян тудырып отыр­ғанына нақты мысалдар келтірді. Нәзік жандарға қарағанда ерлер қант диабетімен 6 есе көп ауырады. Ағзаның бұзылуы салдарынан ер­лердің 50-60 пайызында жүрек-қан тамырлары белең алған. Уро­логия ғылыми орталығы жүргіз­ген скринингтік зерттеу бойынша (2006 ж.) ұрпақ өрбітетін 24 мың ер адамның 56 пайызында ағза­лық ауытқушылық байқалған. Жы­ныс­тық қатынас арқылы тарай­тын аурулар тексерілгендердің 42 пайы­­зында тіркелген. 28,5 мың адам­­ның арасынан мұнай саласында істей­тін жұмысшылардың 63 пайы­­зында, түрлі-түсті металлур­гияда еңбек ететіндердің 53 пайызында белсіздік белгілері пайда болған. Әңгіме арасында «Саламатты Қазақстан» бағдарламасы бойынша 2016-2020 жылдарға арнайы қаржы қарастырылып, ерлердің денсаулығы проблемаларын шешуге қадам жасалып отырғаны да айтылды. Өмір ЕСҚАЛИ,  «Егемен Қазақстан». Солтүстік Қазақстан облысы.