Мәскеуден келіп, қазақша кітап оқыған

Бүгінгі жаһандану дәуірінде үлкен-кіші «сиқырлы сандыққа» үңіліп, жер-жаһандағы жаңалықтарды білуде. Мұның жақсылығы көп болғанымен, кері әсері тиіп жатқан тұстар да жоқ емес. Өйткені, бүгінде жұрт кітапты өте сирек оқиды. Кітапханадағы оқырмандардың тізіміне көз жіберсең, мектеп оқушылары, бала-шаға... Бірақ, осы үдерісті теріске шығаратын жайттың де куәсі болдық. Мәскеу қаласының тұрғыны Надежда Холопова жаз айында Қазталов ауылында тұратын анасы Валя апайға қыдырып келгенде, бірін­ші ­баратын жері – аудандық кі­тап­хана екен. Аз ғана шегініс. Надежда Холопова Қазталов ауылының байырғы тұрғыны, көп жыл ­ұс­таздық қызмет жа­саған Вла­ди­мир Холоповтың келіні екен. Ал Надежданың анасы Валя апай бүгінде Қазталов ауылында бақуатты тұрмыс кешуде. Валя апаймен сөйлесе қалсаңыз, қазақшасымен қазақтарды «сүріндіреді». Ал Надежда өзінің 7 жасар қызы Викториямен жаз айында келгенде кітапханада болуды дағдыға айналдырған. Мақсаты – қазақ тіліндегі кітаптарды қызына оқытып таныстыру екен. Ал өзі қазақша еркін оқып, еркін сөйлейді. Надежданы әңгімеге тарт­қанда, ол: «Мен осы ауылда туып-өстім. Қазір Мәскеу қаласында тұрамын. Жастайымнан қазақ тілінің нәрімен сусындадым. Өте сұлу да бай тіл. Қазіргі күнде Мәскеуде бұл тілдің ортасы болмаған соң жұбайым Коля екеуміз тілді сағынғанда үйде қазақша да сөйлесіп аламыз. Ал анам Валя­ға жазда қыдырып келгенде қазақ тілінде сөйлеп, бір жасап қаламын. Қызым Викторияны ата-анасының кіндік қаны тамған елдің тілін, әдет-ғұрпын, салт-дәстүрін білсін деп әдейі кітапханаға жыл сайын алып келемін. ...Айтпақшы, жастық ша­ғымыз, Колямен алғашқы кез­десудегі махаббат туралы сөздер қазақ тілінде айтылып еді», – деп күліп қойды Надежда апай. Міне, осындай ана тілімізді қадірлеген, тек қадірлеп қана қоймай, қызын да үйретіп жүрген Надеждадан үлгі алуға әбден болады. Жұлдыз АСҚАРҚЫЗЫ. Батыс Қазақстан облысы, Қазталов ауданы.