Атырауда 185,7 шақырым бөгетті күшейту қажет

АТЫРАУ. 5 наурыз. Атырау облысы әкімінің орынбасары Сәлімжан Нақпаевтың төрағалығымен өткізілген мәжілісте көктемгі су тасқынына дайындық мәселесі пысықталып, 185,7 шақырым қорғаныс бөгетінің қуатын күшейту қажеттігі айтылды. Бұл туралы egemen.kz тілшісі хабарлады. Атырау облыстық төтенше жағдайлар департаменті басшысының міндетін атқарушы Марат Құрмановтың мәлім етуінше, 1967-1994 жылдары аралығында 500 шақырымнан асатын қорғаныс бөгеттері салынған. Алайда, Исатай ауданында 1,7 шақырым бөгет салудың қажеттігі туындап отыр. Сонымен бірге, 185,7 шақырым бөгеттің техникалық ахуалы көңілден шықпайды. Қорғаныс бөгеттерін мемлекеттік комиссиямен қабылдау, тіпті тиісті құжаттарын жасақтау жұмыстары Атырау қаласы, Құрманғазы, Исатай, Қызылқоға және Жылыой аудандарында атқарылмаған. «Көктемгі су тасқынына дайындық жұмыстары барысында 12 тонна жанар-жағар май, 200 тонна құм, 187 мыңнан астам қапшық дайындалған. Сондай-ақ, төтенше жағдай туындағанда әр түрлі құрылымдардан 109 адам, 31 техника, 35 жүзу құралы және «Еурокоптер» тікұшағы көмек беруге әзір», деп мәлім етті Атырау облыстық төтенше жағдайлар департаменті басшысының міндетін атқарушы Марат Құрманов. Жолдасбек Шөпеғұл. Дерек: egemen.kz. Сурет: Рахым Қойлыбаев.