Тағаттылық –тұрақты даму негізі

 

Қазақстан Республикасының Президенті жанындағы Орталық коммуникациялар қызметінде Мәдениет және спорт министрлігі Дін істері комитетінің төрағасы Ғалым Шойкиннің, Мәдениет және спорт министрлігі жанындағы Мәдениеттер мен діндердің халықаралық орталығының директоры Ертас Мұратбековтің және Дін мәселелері жөніндегі ғылыми-зерттеу және талдау орталығының директоры Айнұр Әбдірәсілқызының қатысуымен «Конфессияаралық келісім – Қазақстанның тұрақты дамуының негізі» тақырыбында брифинг болып өтті.

Дін саласындағы уәкілетті органның төрағасы Дін істері комитетінің жұмысы Елбасының «Нұрлы Жол – болашаққа бастар жол» Жолдауында белгіленген міндеттерді, «Нұр Отан» партиясы мен Қазақстан халқы Ассамблеясының отырыстарында айтылған ойларын іске асыру шеңберінде мемлекет пен қоғамымыздың тұтастығы мен тұрақтылығын сақтау мен нығайтуға, конфессияаралық ауыз­біршілікті нығайта түсуге, зайыр­лы және дәстүрлі ұлттық, діни-рухани құндылықтарымызды кеңінен насихаттауға жұмылдырылып отырғанын атап көрсетті. Елімізде дәйекті мемлекеттік-кон­фессиялық және конфессияаралық қа­рым-қатынас орнатылған. Осының көрінісі ретінде елімізде берік орныққан ұлтаралық және конфессияаралық келісім әлемде «Қазақстан жолы» ре­тінде танылған. Ғалым Шойкин: «...Бұл – мемлекеттің дін саласында жүргізіп отырған саясатының жемісі» және «Қазақ халқының тегінде бар бауырмалдық пен төзімділіктің нәтижесі», деп атай отырып, бұл, өз кезегінде, еліміздің дамуының бүгіні мен болашағына берік іргетас қалайтынын көлденең тартты. Одан кейін сөз алған Айнұр Әбдірәсіл­қызы дәстүрлі рухани-өнегелілік құн­ды­лықтарды жаңғырту және зайырлылық қағидаттарын ілгерілету бағытында іске асырылып отырған жұмыстарды баяндаса, Ертас Мұратбеков Елбасы бастамасымен құрылып, бүгінгі күнде әлемдік деңгейдегі үнқатысу алаңы ретінде танылған Әлемдік және дәстүрлі діндер көшбасшылары съездерінің мәні мен маңызына жан-жақты тоқталып, биылғы жылғы 10-11 маусымда елордамыз Астанада өтетін V съезге дайындық жұмыстары туралы айтып өтті. Ләйла ЕДІЛҚЫЗЫ, «Егемен Қазақстан».