Украина бүгіннен бастап Ресей газын пайдаланбайтын болды

АЛМАТЫ. 1 шілде. «Нафтогаз Украина» бүгіннен бастап Ресей газын сатып алудан бас тартты. Өйткені, украиналықтар ресейлік «Газпром»-ның 2015 жылдың үшінші тоқсанына бекіткен газ бағасына келісе алмады. Бұл туралы ВВС хабарлады. Бір мәмілеге келе алмағандар келіссөзі Австрияның астанасы Вена қаласында – Украина, Ресей және Еуроодақ өкілдерінің қатысуымен өтті. «Біз міндетті түрде газ сатып аламыз, – деді Укринаның энергетика және көмір өнеркәсібі министрі Владимир Демчишин, – бірақ Ресей газын алмаймыз. Қазан айына дейін бағасын түсірсе, ойланып көреміз.» Демчишиннің айтуына қарағанда, Ресей Премьер-министрі Дмитрий Медведевтің дүйсенбі күні Үкімет кеңесінде бекіткен 1 мың текше метр газға қойылған 247,18 долларлық баға Украина үшін тым қымбат болып шықты. Киев жағы 1 текше метр газдың бағасы 200 доллардан аспаса, әділетті болар еді дейді. Ресей өткен жылғы Брюссельде өткен келісімнен соң биылғы жылдың наурыз айына дейін Украинаға әрбір 1 мың текше метр газды 329 АҚШ долларына сатып келген. Бұл орайда «Нафтогаз» – Украина аумағынан Еуропаға құбыр арқылы тасымалданып жатқан орыс газына қатысты баға бастапқы келісім-шарт бойынша сақталынатыны туралы да жария етті. Талғат Сүйінбай. Дерек: ВВС. Сурет: Reuters.