«Нұр Отанның» XVI съезіне Қарағанды облысынан 110 делегат сайланды

ҚАРАҒАНДЫ. 5 наурыз. «Нұр Отан» партиясы Қарағанды облыстық филиалының кезектен тыс XXII конференциясы болып өтті. Бұл туралы облыстық әкімдіктің баспасөз қызметі хабарлады. Конференция жұмысына партия ардагерлері, филиал басшылары және олардың орынбасарлары, партиялық бақылау комиссиясы, «Жас Отан» жастар қанатының өкілдері қатысты. Конференция ашылуында «Нұр Отан» партиясының Қарағанды облысы бойынша филиалының төрағасы Нұрмұхамбет Әбдібеков кезектен тыс өткізілгелі отырған президент сайлауын «Қазақстан - 2050» және «Мәңгілік Ел» идеяларының жүзеге асуын қамтамасыз етудегі тарихи мүмкіндік деп атап көрсетті. «Бүгінде, Қазақстан Республикасы экономикасының дамуындағы жаңа кезеңге көтерілген кезінде, облыстағы «нұротандықтар» партия төрағасы Нұрсұлтан Әбішұлы Назарбаевты президент сайлауына үміткер ретінде толықтай қолдап отыр», – деді аймақ басшысы өз сөзінде. Жиын соңында облыстық филиалдың бірінші орынбасары Қадиша Оспанова партияның XVI сьезіне делегат болып баратын 110 адамның тізімін жасады. Бұл тізім конференцияға қатысушылары тарапынан толықтай қолдау тапты. Айқын Несіпбай. Дерек, сурет: Қарағанды облыстық әкімдігінің баспасөз қызметі.