Батыс Қазақстанда ат спорты түрлерінен ел чемпионаты өтті

ОРАЛ. 1 шілде. Батыс Қазақстан облысы, Зеленов ауданы, Асан ауылындағы ат спорты түрлері бойынша облыстық балалар-жасөспірімдер спорт мектебі базасында көкпар, аударыспақ, теңге ілу және жамбы атудан жастар арасында ел чемпионаты мәреге жетті. Бұл туралы «ҚазАқпаратқа» сілтеме жасаған egemen.kz тілшісі хабарлады. Көкпардың финалында қызылордалықтардан басым түскен оңтүстікқазақстандықтар жеңімпаз атанды. Үшінші орынды батысқазақстандықтарды 5:2 есебімен ұтқан Жамбыл облысының командасы иеленді. Аударыспақтан өз салмақ дәрежелерінде оңтүстікқазақстандық Еламан Пернебек (50 кг.), қызылордалық Бердібек Жорабек (60 кг.), ақтөбелік Шыңғысхан Ержанов (70 кг.), оңтүстікқазақстандық Есімхан Рахматулла (80 кг.), ақтөбелік Саят Сатым (+80 кг.) жеңіс тұғырына көтерілді. Теңге ілуден ақтөбелік Әлихан Бәшенбай үздік шықса, жамбы атудан оңтүстікқазақстандық Ералхан Айкөз алдына жан салған жоқ. Жарыстың жабылу рәсімінде облыс әкімі Нұрлан Ноғаев ата-бабамыздан бері үзілмей жалғасып келе жатқан ұлттық спорт түрлерін одан әрі дамытудың қажеттігін атап көрсетіп, барлық командаларға алғысын айтты. Ұлттық спорт түрлерінен Қазақстанның мемлекеттік жаттықтырушысы Рамазан Сәттібаев жарысты өткізуге белсене атсалысқан азаматтарға ұлттық спорт түрлері федерациясының алғысхаттарын табыс етті. Оның сөзіне қарағанда, жарыс қорытындысына сәйкес ұлттық құрама жасақталатын болады. Темір Құсайын. Дерек, сурет: «ҚазАқпарат».