Солтүстік Қазақстанда сарбаздар сайысы басталды

ПЕТРОПАВЛ. 5 наурыз. Солтүстік Қазақстан облысындағы №6637 әскери бөлімінде «Орталық» өңірлік қолбасшылығы президенттік көпсайысының біріншілігі басталды. Бұл туралы әскери бөлімнің баспасөз қызметі хабарлады. Сайысқа еліміздің 9 өңірінен 60-тан астам әскери қызметшілер мен сарбаздар жиналды. Үш күнге созылатын сайыста қатысушылар спорттың президенттік көпсайыс, шаңғы жарысы, пневматикалық тапаншамен нысана көздеу, белтемірге тартылу түрлерінен күш сынасады. «Өңірлік қолбасшылық спартакиадасына кіретін президенттік көпсайыстың мақсаты – әскерилер арасында саламатты өмір салтын насихаттау, дене күшін толықтыру, төзімділік, шыдамдылық сынды қасиеттерге баулу», дейді дене шынықтыру және спорт бөлімінің басшысы Кирилл Кромин. Алғашқы жарыс күні пневматикалық тапаншадан ату бәсекесі өтті. Бұл сында қарағандылық Евгений Бердников пен петропавлдық Елнұр Оразаев мергендік танытып, жарыс көшін бастады. Белтемірге тартылудан Астана мен Көкшетаудан келген сарбаздар жақсы әсер қалдырды. Өмір Есқали. Дерек: №6637 әскери бөлімінің баспасөз қызметі. Сурет: elarna.com.