Венесуэлада бокстасатын «арландар» анықталды

АСТАНА.  5 наурыз. Бүкіләлемдік бокс сериясында (WSB) ел намысын қорғайтын «Астана арландары» келесі жекпе-жектерін «Caciques Venezuela» командасына қарсы өткізеді. Бүгін осы айқасқа қатысатын «арландардың» есімдері белгілі болды. Бұл туралы egemen.kz хабарлады. Жаттықтырушылардың шешімі бойынша алдағы сында «Астана арландарының» намысын Олжас Сәттібаев (52 кило), Зәкір Сафиуллин (60 кило), Асланбек Шымбергенов (69 кило), Хрвое Сеп (81 кило) және аса ауыр салмақта (+91 кило) Филипп Хргович қорғайды. Қос команда арасындағы тартыс 7 наурыз күні Венесуэла астанасы Каракас қаласында өтеді. Осыған дейін жеті жекпе-жек өткізіп, барлығында жеңіске жеткен «арландар» 21 ұпаймен WSB жобасының В тобында көш бастап тұр. Өз кезегінде венесуэлалықтар жеті жекпе-жектен 10 ұпай жиып 6-орынға табан тіреген. Биылғы маусымның алғашқы айналымында қарсыластар Астанада сынға түсіп, «арландар» 5:0 есебімен оңай жеңіске жеткен еді. Ол кезде біздің команда сапында Мардан Берікбаев (49 кило), Мейірболат Тоитов (56 кило), Самат Башенов (64 кило), Мейірім Нұрсұлтанов (75 кило) және Василий Левит (91 кило) бокстасты. Аталған айқас екі команда үшін маусымашар жекпе-жек болғанын айта кетейік. Еламан Қоңыр. Дерек: egemen.kz. Сурет: worldseriesboxing.com.