Солтүстік Қазақстанда заң бұзған шенеунік қызметінен алынады

ПЕТРОПАВЛ. 5 наурыз. Петропавлда Солтүстік Қазақстан облыстық тәртіптік кеңес төрағасы Әділбек Мұқашевтың басшылық етуімен өткен отырыста сыбайлас жемқорлыққа қарсы заңнама талаптарын өрескел бұзған шенеунік қызметінен алынатыны мәлім болды. Бұл туралы облыстық мемлекеттік қызмет істері және сыбайлас жемқорлыққа қарсы іс-қимыл департаментінің баспасөз қызметі хабарлады. Айыртау аудандық тұрғын үй-коммуналдық шаруашылығы, жолаушылар көлігі және автомобиль жолдары бөлімінің жетекшісі С.Дайыровқа қатысты қаралған мәселе осындай шешіммен аяқталды. Өйткені, шенеунік мемлекеттік сатып алу конкурсын өткізбестен-ақ «Норд жолдары» жауапкершілігі шектеулі серіктестігіне төрт миллион теңгені ұстата салған. Сөйтіп, қыс мезгілінде автомобиль жолдарын тазалау жайлы келісім-шартты түзу барысында заңға қайшы әрекеттерге барған. Осылайша сыбайлас жемқорлықпен күрес талаптарын белден бір-ақ басқан жауапты тұлға қызметінен алынатын болды. Облыстық филармонияның басшысы Б.Ақмағамбетованың құқық бұзушылық іс-әрекеттері туралы қала прокуратурасы өкілінің есебінен кейін тәртіптік кеңес мүшелерінің  істі өкілетті орган қарауына жолдау керек деген ұсынысы қабылданды. Оған Б.Ақмағамбетованың қалалық мәслихат дептутаты мәртебесі бірден-бір негіз болды. Өмір Есқали. Дерек: Солтүстік Қазақстан облыстық мемлекеттік қызмет істері және сыбайлас жемқорлыққа қарсы күрес департаментінің баспасөз қызметі. Сурет: qazaquni.kz.