Түркістандағы орталық базар қала сыртына көшіріледі

ШЫМКЕНТ. 5 наурыз. Оңтүстік Қазақстан облысындағы Түркістан қаласында бұдан бірер күн бұрын от құшағына оранған орталық базар жабылып, ол көне шаһар сыртындағы жаңа жерге қоныс аударады. Бұл туралы otyrar.kz хабарлады. «Елбасының тапсырмасы бойынша, әр қаланың ортасындағы базарлар сыртына шығарылуы тиіс. Түркістандықтар берілген тапсырманы орындауға бірден кіріскен. Шаһар сыртынан «Барлық» деп аталатын базар да ашқан. Алайда, сатушылар жаңа орынға көшуге келгенде белсенділік танытып отырған жоқ», - делінген хабарламада. Телеарна осыған байланысты қазір орталық базардағы әйелдердің көңілі су сепкендей басылғанын жазады. Мұны ол «Жылдың басында сауда жүрмей, шығынға батқан шақта қаланың сыртындағы жаңа базарға көшсек, салықтарды төлей алмай қиналып қаламыз деп қорқады», - деп түсіндіреді. Жергілікті билік ағымдағы жылдың соңына дейін орталықтағы базарларды қаланың сыртына көшіруі тиіс. Босаған жерде көріктендіру жұмыстары жүргізіліп қоғамдық орындар ашылады деп жоспарланып отыр. Бақтияр Тайжан. Дерек, сурет: otyrar.kz.