Киелі Түркістаннан бастау алған Тайқазанның көшірмесі Жамбыл жеріне көктем шуағын, жылылық, ізгілік алып келді. Тоқшылық пен береке-бірлік белгісіне айналған «Қазақстан халқы Ассамблеясы – 20 ізгі іс» эстафетасының басты символын жамбылдықтар 1 наурыз күні Қордай ауданында үлкен ықыласпен қарсы алды. Сөйтіп, осы апта ішінде Жамбыл облысының барлық аудандарын аралаған Тайқазан іші қайырымды істермен толыға түсті.
«Қазфосфат», «Хантау» ЖШС-лері, «Мыңарал» цемент зауыттары бастаған өңірдегі ірілі-ұсақты кәсіпорындар, шаруашылықтар, жеке кәсіпкерлер көпбалалы, әлеуметтік аз қамтамасыз етілген отбасыларға, соғыс және еңбек ардагерлеріне, мүгедек жандарға бағалы сыйлықтар тапсырып, көмек қолдарын созды. Нақтырақ айтсақ, Шу ауданы 200 адамдық оңалту орталығына 5 млн. теңгеге автобус сатып алып берсе, Мойынқұм және Байзақ аудандары аз қамтамасыз етілген отбасыларға 2 млн. теңге, Жуалы ауданы ауған соғысы ардагерлеріне 2,5 млн. теңге, Сарысу ауданы көпбалалы отбасылардағы студенттердің оқу қаржысын төлеуге 2,4 млн. теңге, соғыс ардагерлерінің үйлерін жөндеуге 590 мың теңге, сондай-ақ, 1 млн. теңгеге 2 жазушының кітабын шығаруға, Жамбыл ауданы 40 соғыс ардагеріне 480 мың теңге көлемінде көмек көрсетті.
Бұдан бөлек, этномәдени бірлестіктер алыс ауылдарда тұратын 125 адамға 400 мың теңгенің дәрі-дәрмектерін алып берді. Эстафета аясында жасалған қайырымдылық істердің соңы қай ауданда болмасын, түрлі ұлт өкілдерінің, еңбек ұжымдарының, мектеп оқушыларының қатысуымен ұлан-асыр мерекелік іс-шараларға ұласып жатты. Әсіресе, түрлі ұлт өкілдерінің белсенділігі айқын аңғарылды.
Сөйтіп, кеше Тайқазан сан ғасырдан сыр шерткен көне Тараз қаласына келіп жетті. Ауыр атлетикадан әлем чемпионы Жасұлан Қыдырбаев, талай білім сайысының жүлдегерлері атанған Айдын Қойбек пен Әлішер Тәжіханов салтанатты түрде төрге алып шыққан Тайқазан тағы да көптеген қайырымды істерге мұрындық болып, елдің тұла бойын мейірімге толтырды. Тараз қаласының әкімі Нұржан Календеров бастаған кәсіпкерлер, басқа да жомарт азаматтар бұл күні көптеген жандарға қайырымдылық қолын созды.
«Бірлік пен бейбітшілік бар жерде мейірімділік орнап, қайырымдылық істер қашанда жалғаса берері сөзсіз. Әулиеата жерін мекендеген сан түрлі ұлт өкілдерінің Қазақстан жеріне, Елбасына деген алғыстары мен ризашылықтары өте мол», – дейді Жамбыл облысы әкімінің орынбасары Ерқанат Манжуов.
Көне Тараз қаласы тұрғындарының жомарттығы мен кеңпейілдігінің куәсі болған Тайқазан осы күні Жетісу жеріне жол тартты. Қазақстан халқы Ассамблеясы Алматы облыстық хатшылығының меңгерушісі Тұрсынбай Ғабит тараздықтарға Жетісу елінің ыстық сәлемін жолдап, осы игілікті іске өз үлестерін молынан қосатындықтарын жеткізді.
Оралхан ДӘУІТ,
«Егемен Қазақстан».
Жамбыл облысы.
Суретті түсірген
Ақәділ РЫСМАХАН
