Каспийде атылған оқ

Қазақстан Республикасы Ұлт­тық қауіпсіздік комитетіне қарас­ты Ақтау қаласындағы «Жаға­лау күзеті басқармасы шекара­шылары Каспий теңізінің қазақ­стандық аумағын заңсыз кесіп өтіп, браконьерлікпен балық аула­ған Әзербайжан Респуб­лика­сының азаматтарын қолға түсір­ді. Жауынгерлік кезекті тек­серіске шыққан «Тараз» шекара кемесінің экипажы теңіз үстінен браконьерлерді байқап, оларға тоқтауға белгі береді. Алайда, «Байда» қайығын бар жылдамдыққа салып, қаша жөнелген әзербай­жандықтар Қазақстан шекарасынан қара үзіп кетуді көздейді. Сол күні ақ көбіктене құтырынған ақжал толқындары жағаға ұрып аласұрған теңіздің асау мінезімен алыса алға ұмтылған Қазақстан шекарашылары оларды оңайлықпен құтқармайды. Екі рет аспанға атылған ескерту оғынан соң, әзербай­жандық браконьерлерге «Қы­зылқұм» мүйісі тұсында Қазақстан шекарашыларына бері­луге тура келеді. Тінту кезінде олардан 28 жәшік тыйым салынған балық аулау құралдары мен жалпы салмағы 946 килограмды құрайтын 240 бекіре тұқымды балық тәркіленеді. Және браконьерлердің бекіренің уылдырық шашатын ірілерін ұстағаны анықталған. – Ақтау қаласындағы уақыт­ша тергеу изоляторына қа­малған браконьерлердің үстінен Қазақстан Республикасы Қылмыстық ко­дексінің мемле­кеттік шекараны заңсыз кесіп өту және браконьерлік баптары бойынша қылмыстық іс қозғалды. Қазір тергеу амалдары жүруде, іс Қарақия аудандық ішкі істер бөліміне жолданатын болады, дейді ҚР Шекара қызметі «Жағалау күзеті» өңірлік басқармасы, 2201 А әскери бөлімінің командирі Ерхан Рысқалиев. Сол күні Маңғыстауда ауа райы қолайсыз болатын. Секундына 25 метр жылдамдықпен өрекпи соққан желдің құрғақ жердің топырағын суыра үйіріп, ала шаң етсе, теңіз бетін астаң-кестең толқынға тол­тыр­ғаны белгілі. Қиын кезде та­бандылық танытқан шекарашылар қарақшыларды құрықтап қана қойған жоқ, биыл алғаш рет браконьерлерге балық­ты теңізге тас­тап жіберуге жол бермеді. Бортта қалған балықтардың шығыны есептеліп қана қоймай, браконьерлер тиісті өз жазаларын алатын болады. Гүлайым ШЫНТЕМІРҚЫЗЫ, «Егемен Қазақстан». Маңғыстау облысы.