АСТАНА. 2 шілде. «Егемен Қазақстан» республикалық газеті акционерлік қоғамы дайындап, шығарып отырған «Президент» атты жинақ газеттің 2010-2015 жылдар аралығындағы нөмірлерінде жарық көрген Елбасы Нұрсұлтан Назарбаев туралы алуан түрлі мақалаларды оқырман назарына ұсынып отыр. Осыған орай газет ғимаратында «Президент» жинағының тұсаукесер рәсімі өтеді. Бұл туралы egemen.kz хабарлады.
«Президент» атты жинақ «Егемен Қазақстан» республикалық газеті акционерлік қоғамның бұған дейінгі жылдары шығарған «Елбасы», «Тәуелсіздік», «Салтанат», «Астана» және «Дінтұтқа» жинақтарымен бір серияны құрайды. Кітап сонымен қатар Президенттің алғашқы 20 жылдағы мемлекет басқару кезеңін қамтитын «Елбасы» топтамасының мазмұн жағынан жалғасы іспеттес.
Жинақта қамтылған әрбір жылдың материалдары жеке тарауға біріктірілген. Оның басы Елбасының балалық және жастық шақтары туралы сөз етілетін мақала-сұхбаттан басталады. Бұдан әрі болашақ Мемлекет басшысының ұшқан ұясынан алған тәрбиесі мен өсу жолдары, үлкен өмірге қарай басқан алғашқы қадамдары, осының желісінде Днепродзержинскідегі оқыған жылдары, Елбасының туған жерге деген көзқарасы мен ол жөніндегі тебіренісі сөз етіледі. Келесі мақалаларда осындай өмір өткелдерінен өткен Елбасының қазақ тілінің мәртебесін көтерудегі ерен еңбегі, Есілдің бойына ел байтағын орналастыру жолындағы үлкен көрегендігі, Қазақстанның даму жолын таңдаудағы кемеңгерлігі, сыртқы әлеммен қарым-қатынастағы сындарлы саясаты, осының негізінде жаһан жұрты санасатын тегеурінді тұлғаға айналуы жайлы толымды толғам айтылып, салиқалы сыр шертіледі. Кітапта көптеген авторлардың Президенттің ел басқару ісіндегі кредосына, бағыты мен бағдарына ғылыми, философиялық және әлеуметтік тұрғыдан баға беруге құрылған талдамалы материалдары да көптеп орын алған. Мұнда сондай-ақ, Нұрсұлтан Әбішұлының бауырларымен, бірге өскен достарымен жүргізілген сұхбаттар да қамтылған. Осында сөз болатын жайттарды Елбасы туралы түсірілген фильмдер бойынша жазылған шолу-рецензия тиянақтап береді.
Кітап негізінен Елбасы мен оның іргелі істері туралы мемлекет және қоғам қайраткерлері, ғалымдар мен жазушылар, өнер және еңбек адамдары жазған мақалалардан құралған. Бұлардан бөлек, ақындардың ода, толғау және тілек мазмұнында толғаған бір топ өлеңдеріне де кезек берілген. Жинақта сондай-ақ, Президенттің осы бес жыл ішіндегі әртүрлі кездесулерден түсірілген суреттері де жеке топтама түрінде көрінеді. Жалпы, кітаптың көлемі 804 бетті құрайды.
Аталмыш жинақтың тұсаукесер рәсімі 3 шілде күні, сағат 16:00-де «Егемен Қазақстан» газетінің редакциясында өтеді.
Талғат Райымбек.
Дерек, сурет: egemen.kz.
