АСТАНА. 26 тамыз. Қазақстан Президенті мен Пәкстан премьер-министрі келіссөздердің қорытындысы бойынша бірлескен баспасөз брифингін өткізді. Бұл туралы akorda.kz хабарлады.
Брифингте Қазақстан Президенті келіссөздер барысында екіжақты ынтымақтастықтың кең ауқымдағы мәселелері қозғалғанын және өңірдің ахуалы, соның ішінде Ауғанстан мен Таяу Шығыстағы жағдайдың талқыланғанын атап өтті.
Мемлекет басшысы көлік-транзит саласындағы ықпалдастықты дамытуға айрықша көңіл бөлінгенін, екі елдің тауар айналымы деңгейін арттырудың осыған байланысты екенін айтты. «Қазақстанның «Нұрлы жол» бағдарламасы мен Қытайдың «Жібек жолының экономикалық белдеуі» және Қарақорым жолы мемлекеттер арасындағы ынтымақтастықты жандандыруға септігін тигізеді деп санаймын. Сонымен бірге, Қазақстан-Түрікменстан-Иран теміржолы Пәкстанның теңіз порттарына шығуға жол ашады. Осы көлік байланыстары бізге сауда және экономикалық қарым-қатынастарды жақсартуға мүмкіндік береді», – деді Қазақстан Президенті.
Нұрсұлтан Назарбаев өнеркәсіпке, фармацевтикаға, энергетикаға, әскери-техникалық салаға, ғылымға және басқа да маңызды бағыттарға қатысты Қазақстан мен Пәкстанның нақты қадамдары туралы уағдаластыққа қол жеткізілгенін айтты.
Қазақстан Президенті ауыл шаруашылығы өнімдерін өңдеу, химия және жеңіл өнеркәсіп, банк секторы сияқты салаларда ынтымақтастықты жолға қою мақсатында Іскерлік кеңес құрылғанына да тоқталып өтті. Сонымен қатар, Пәкстан премьер-министрі делегациясының құрамында іскер топ өкілдері де келді.
Мемлекет басшысы Пәкстан Н.Шарифтің басшылығымен экономикалық өсім қарқынын үдетіп, әлемдік саясаттағы салмақты орны бар елге айналып келе жатқанын атап өтті.
Нұрсұлтан Назарбаев Азиядағы өзара іс-қимыл және сенім шаралары кеңесін өткізу, «ЭКСПО-2017» көрмесін өткізу құқығы үшін дауыс беру, Қазақстанның ДСҰ-ға кіруі мәселелеріне қатысты біздің елімізді Пәкстанның қолдағанына және бүгінгі таңда Қазақстанның БҰҰ Қауіпсіздік кеңесінің тұрақты емес мүшелігіне кандидатурасын да қолдап отырғанына назар аударды. Осыған орай Мемлекет басшысы Пәкстан тарапына зор алғыс білдірді.
Пәкстан премьері жылы қабылдау мен қонақжайлық үшін алғыс айтып, жаңа елорда – Астана қаласы Қазақстанның ілгерілеуі мен өркендеуінің символы болып саналатынын атап өтті. «Мені Нұрсұлтан Назарбаевтың кемел басшылығының арқасында Қазақстанның қол жеткізген әлеуметтік-экономикалық прогресінің ауқымы тәнті етті. Біз елдеріңізге алдағы уақытта да табыс пен бақ-береке тілейміз. Біздің мемлекеттерімізде қарым-қатынас пен өзара ынтымақтастықты жақсартуға қажетті зор әлеует бар», – деді Н.Шариф. Ол сапар барысында тараптар екіжақты қарым-қатынастар мен халықаралық күн тәртібіндегі кең ауқымды мәселелерді талқылағанын да айтты. «Біз білім және ғылым, экономика, көлік, кеме құрылысы, сондай-ақ әуе қатынасы салаларындағы өзара ықпалдастықты нығайтуға келістік. Қазақстан мұнайы мен газының импортына, жеңіл өнеркәсіпте, ауыл шаруашылығында, фармацевтика және басқа салаларда бірлескен кәсіпорындар ашуға қатысты уағдаластықтарға қол жеткізілді», – деді Пәкстан Ислам Республикасының премьер-министрі.
Н.Шариф екіжақты қатынастардағы институционалдық тетіктерді нығайту интеграциялық үдерістерге, бүкіл өңірдегі бейбітшілік пен тұрақтылықты сақтауға оң ықпал ететінін атап өтті. «Қазақстан мен Пәкстан ШЫҰ және БҰҰ сияқты халықаралық ұйымдар аясында бұдан әрі де ынтымақтасуға ықылас танытып отыр», – деп атап өтті Н.Шариф.
- Пәкстан премьері Н.Шарифтің Қазақстанға ресми сапары аясында қол қойылған екіжақты құжаттардың тізімі:Қазақстан Республикасының Президенті мен Пәкстан Ислам Республикасының премьер-министрінің бірлескен мәлімдемесі.
- Қазақстан Республикасының Қорғаныс министрлігі мен Пәкстан Ислам Республикасының Қорғаныс министрлігі арасындағы Қазақстан Республикасы Қарулы күштерінің әскери қызметшілерін Пәкстан Ислам Республикасы Қорғаныс министрлігінің әскери оқу орындарында оқыту туралы келісім.
- Қазақстан Республикасының Сыртқы сауда палатасы мен Пәкстан Ислам Республикасының Сауда және өнеркәсіптік палаталары федерациясы арасындағы бірлескен Іскерлік кеңесті құру туралы өзара түсіністік меморандум.
Айдар Өрісбаев.
Дерек, сурет: akorda.kz.
