Бірлік – басты байлығымыз

Елбасы «Ұлт Жоспары – 100 қадам: баршаға арналған қазіргі заманғы мемлекет» атты бес инс­­­титуттық реформасын жариялады. Бұл – мемлекетті заманның дауылы мен жауынына ұрындырмай, елімізді өркениет көшіне ілестіріп, дамуын одан әрі жалғай беретін баянды жоспар. Онда кәсіби мемлекеттік аппарат құру, заң үстемдігін қамтамасыз ету, индустрияландыру және экономикалық өсім, біртектілік пен бірлік, есеп беретін мемлекет қалыптастыру секілді қадау-қадау мәселелер айтылған. Бағдарламада айтылған мәсе­лелердің барлығын халық жаппай қолдайды. Өйткені, бұл заман талабына сай жасалып отырған реформа. Ал оны жүзеге асыру үшін елдің бірлігі мен ынтымағы ауадай қажет. Сондықтан, 130-дан астам ұлт пен ұлыс мекендейтін Қазақстанда халық арасындағы достықты нығайта беру керек. Бұл ретте Елбасының «Ұлт Жос­парында» нақты айтылған. Бүгінде «Нұрлы Жолға» түскен Қазақ­станның ең биік мұраты «Мәңгілік Ел». Тәуелсіздігімізді тұғырлы, мем­лекеттілігімізді ғұмырлы ету барысында үлкен жобалар қолға алынды. Соның бірі – «Мәңгілік Ел» патриоттық акциясы. Мемлекет басшысы аталған акцияны одан әрі дамыта беруді тапсырып отыр. Сонымен қатар, азаматтық біртектілікті нығайту үшін «Менің елім» ұлттық жобасын әзірлеп, жүзеге асыру­ды міндеттеді. Осы жобаның негі­зінде «Қазақстан энциклопедиясы» атты кең көлемді интернет порта­лы құрылады. Мұндағы мақсат әрбір қа­зақстан­дық азамат пен шетел­дік қонақ­тарға еліміз туралы жан-жақты ақпаратпен та­нысты­ру болып табылады. Пор­талда Қазақ­станның 3D бейне турлары, елдің тарихы мен мәде­ниеті, қызықты оқиғалар мен қара­пайым адамдардың өмірі жайында ақпараттар жарияла­нады. Бір сөзбен айтқанда, портал Қазақ­станның «сапарнама кар­точ­касына» айналады. Осы кезеңге дейін еліміздегі ұлтаралық бірлікті сақтап, біртұтас халық жасақтауға байланысты үлкен жұмыстар атқарылды. Бір ғана Қазақстан халқы Ассам­блеясының құрылып, осы бірегей институттың төңірегіне түрлі ұлттың басын біріктірудің өзі айтуға оңай болғанмен, іс жүзінде ауыр жұмыс. Дегенмен, Қазақстан оны өз қолымен жасап шықты. Ал бес институттық реформа барысында бұл тараптағы жұмыс тіпті жандана түседі деген ойдамын. Тимур ҚАСЫМОВ, облыстық «Кызылординские вести» газетінің бас редакторы. Қызылорда облысы.