Тұрақты кеңес шешімін жоғары бағалады

ЕҚЫҰ-ның Іс басындағы төр­ағасы, Қазақстан Республи­ка­сының Мемлекеттік хатшысы – Сыртқы істер министрі Қанат Сау­дабаев кеше Ұйымның Вена­дағы Тұрақты кеңе­сінің Қырғызстанға Полицейлік Консультативтік Топты жолдау туралы қабылдаған шешімін жоғары бағалады, деп хабарлады СІМ-нің баспасөз қызметі. “Қазақстан басынан бастап, ұйымның мандатына сәйкес, ЕҚЫҰ-ның Қырғызстандағы жағ­дайды реттеуге барынша тиім­ді қаты­суын қолдағаны белгілі. Осы орайда біз әуел бастан Қыр­ғыз­станның Полицейлік Консуль­та­тив­тік Топты жолдау туралы өтінішін қолдаған болатынбыз. Мен ЕҚЫҰ-ның барлық 56 мүше-мемлекеті көрегендік та­нытып, Қырғызстанға полицейлік консультанттар жіберу жөнінде келісімге келгендеріне және біз­дің Венадағы өкілетті өкіл­деріміздің шешімімен рәсімдел­ге­нін шын ниетіммен қолдаймын. Полицейлік Консультативтік Топ­­тың жақында қантөгіс қақ­тығыс­тардың аренасына айналған ай­мақ­тарда болуы елдегі сенімнің ар­туына, тұрақтылықтың ны­ғаюы­на және тәртіптің орнауына өз ықпа­лын тигізеді. Алматыда өт­кен ЕҚЫҰ министрлерінің бей­ресми кездесуінде Президент Нұрсұлтан На­зарбаев атап өт­кен­дей, Қазақ­стан алдағы уақытта да туыстас Қырғыз еліне ЕҚЫҰ төр­ағасы ретінде де, екіжақты фор­мат­та да өз қолдауын көрсете бер­мек”, деп атап көрсетті Қ.Саудабаев. Үстіміздегі жылдың 22 шіл­десінде ЕҚЫҰ-ның Тұрақты кеңесі Қырғызстанға Полицейлік  Кон­суль­тивтік Топты шұғыл түр­де жібе­ру туралы  шешім қабыл­дағаны белгілі. ЕҚЫҰ-ның мүше мем­ле­кеттерінің азаматтары іші­нен құқық қорғау саласының ма­мандары арасындағы жедел түрде өткен іріктеуден кейін 52 адамнан тұратын бірінші топ шамамен төрт айға жіберілетін болады. Қырғызстанның үкіметі мен ЕҚЫҰ-ның Тұрақты кеңесінің шешімі бойынша миссияның мер­зімі, сонымен қатар қатысу­шы­лардың саны көбеюі мүмкін. 17 шілдеде Алматыда өткен ЕҚЫҰ-ның сыртқы істер ми­нистрлерінің бейресми кез­де­суі­нің соңында Қырғызстанға По­лицейлік  Консультивтік Топты жіберу ту­ра­лы мүше мемлекеттер арасында ке­лісімге қол жеткізіл­гені туралы хабарланған болатын.