Әуе қақпасының әлеуеті жоғары

Бақ қонып, құт дарыған қазақ даласы ұрпағына бар байлығын жомарттана жайып тұр. Қазақстан өзінің осы бір ұлан-ғайыр дархан даласының географиялық орналасуының арқасында Еуропа мен Азия елдерін байланыстыратын алтын көпірге айналды. Мемлекет басшысының жақында жариялаған Ұлт жоспарын іске асыру арқылы Қазақстан ірі көлік-логистикалық хабқа айналмақ. Елбасы Нұрсұлтан Назар­баев­тың 5 институттық реформасын жүзеге асыруға бағытталған 100 нақты қадамда «Эйр Астана» ха­лық­аралық бағыттарға ыңғай­лас­тырылады және әлемнің негізгі қаржы орталықтарына (Нью-Йорк, Токио, Сингапур) жаңа бағыттар ашады. «Эйр Астананың» дамуы «ҚТЖ»-ның баламалы маршруттарды  дамыту жөніндегі жоспарымен үйлестіріледі, бұл жүктерді жеткізу құнын екі еседен астам төмендетуге мүмкіндік береді» деп атап көрсетілген. Осыған орай «Эйр Астана» әуе тасымалдау­шы­сы аталған бағыттарға ұшу сапар­ларын ұйымдастыру, жаңа бағыт­тарды бағындыру міндеттеріне кірісті. Бүгінде «Қазақстан темір жо­лы» ҰК» АҚ «Қорғас – Шығыс қақпасы» арнайы экономикалық аймағын салудың соңғы кезеңін жүзеге асыруда. Компания бас­па­сөз қызметінің хабарлауынша, көлік-логистикалық кешен ала­ңын­да басқа да нысандар құры­лысы салынуда. Жақын арада ке­дендік рәсімдеу орталығы және кон­тей­нерлік терминалдар қолданысқа енгізілетін болады. Көлік-логисти­калық кешен құрылысы алдағы уақытта да жалғасады. 2016 жылы халықаралық «Батыс Еуропа – Ба­тыс Қытай» көлік дәлізімен ұштаса­тын автокөлік жолы пайдалануға берілмек. Тағы бір айта кететін мәселе, «ҚТЖ» ҰК» АҚ құрылымында арнайы «Airport Management Group» ЖШС құрылып, отандық бірқатар әуежайларды дамыту міндетін қолға алды. «Қазақстанның 11 мем­лекеттік әуежайын дамытуға 2030 жылға дейін 250 миллиард теңге немесе 1 миллиард еуро қаржы қарастырылып отыр. Бұл қаржыға әуежайлардың ұшу-қону алаңдары жаңғыртылып, жаңа терминалдар құрылысы салынып, ұшақтарға қызмет көрсететін жаңа техникалық қондырғылар сатып алынбақ. Бұл аталмыш мемлекеттік әуежайлардағы қызмет көрсету сапасын жақсартып, қауіп­сіздікті арттырады», дейді «Air­port Management Group» компа­ниясының басқарма төрағасы Клод Бадан. «Airport Management Group» ЖШС «KTZ Express» акционерлік қоғамының 100 пайыздық серік­тес кәсіпорны болып табылады. Ол мемлекеттік әуе­жайларды басқару мақсатымен «Қазақ­стан темір жолы» ҰК» АҚ құрылымында дүниеге келген болатын. Өткен жылдың қыркүйек айында 11 мемлекеттік әуежайдың алтауының – Астана, Көкшетау, Петропавл, Қостанай, Шымкент және Қызылорда әуежайларының мемлекеттік пакет акциялары 7 жыл мерзімге «Airport Management Group» ЖШС-іне басқаруға берілді. Алдағы уақытта бұл компанияға Ақтөбе, Атырау, Павлодар, Семей және Өскемен қалаларының әуе­жайлары да беріледі. Компания бас­шысының айтуынша, олар бұл әуе­жайларды халықаралық стан­дарт­тарға сәйкес жаңғыртып, ұшу-қону қауіпсіздігін жақсартады. Сонымен бірге, олар алдағы уақытта бұл мем­лекеттік әуежайлардың қаржылық тұрақтылығын қамтамасыз ету мәсе­ле­сін де өз міндеттеріне алып отыр. Қазіргі уақытта «Эйр Астана» елордадан Сеул, Париж және Тби­лиси қалалары бағыттарына халықаралық ұшу сапарларын жүзе­ге асырады. Еске сала кететін болсақ, биылғы жылы 29 наурызда «Эйр Астана» әуекомпаниясының «Бойнг-757» әуе кемесі Астанадан Парижге алғаш рет тікелей ұшу сапарын жүргізді. Енді бұл халық­аралық ұшу сапары аптасына үш рет (сәрсенбі, жұма, сенбі) қаты­найды. Оның ұшу уақыты 7 сағатты құрайды. Алдағы уақытта «Эйр Ас­тана» компаниясы Дубай және Гон­конгпен тікелей әуе байланы­сын орнатпақ.  Ал 2016 жылы Жа­по­ния астанасы Токио қаласына тікелей ұшу бағытын ашады. 2019 жылы қазақ­стандықтар Нью-Йорк қаласына тікелей ұшу мүмкіндігіне ие болмақ. Елбасы Нұрсұлтан Назар­баев атап көрсеткендей, бола­шақта Астанада төрткүл дүниемен тікелей байланыс жасайтын  тоғыз жолдың торабы  түйіседі. Жылқыбай ЖАҒЫПАРҰЛЫ, «Егемен Қазақстан».