Елбасы Нұрсұлтан Назарбаев орталық билік органдарының аппараттарын білікті де білімді мемлекеттік қызметкерлермен толықтыру мәселесін ұдайы назарда ұстап, тұрақты көңіл бөліп отырады. Жақында Мемлекет басшысы өңірлердегі білікті жас кадрларды орталықтағы мемлекеттік қызметке тарту, орталық аппараттардағы тәжірибелі кадрларды жергілікті жерлерге жіберіп, тұрақты кадр алмастыру тәжірибесін қалыптастыруды ұсынған болатын. Ал мемлекеттік қызметке тартылған жас кадрлардың әлеуметтік-тұрмыстық мәселесін шешу де кезек күттірмейтін міндет.
Жақында Қазақстан Республикасының Мемлекеттік қызмет істері жөніндегі агенттігі Астана қаласының сол жағалауында 32 мың шаршы метрден астам аумақты алып жатқан мемлекеттік қызмет саласының жас кадрларына арналған 9 қабатты жаңа жатақхана ғимаратын пайдалануға берді. Төрт блоктан тұратын бұл заманауи жатақханада 1000 жас маманға арналған тұрғын бөлмелер жабдықталған. Жатақхананың әрбір қабатында демалыс бөлмелері, ас үй, кір жуатын орын және басқа тұрмыстық бөлмелер бар. Жас мамандар тұратын жатақхана бөлмелері жиһаздармен толық жабдықталған.
Әрбір блокта спорт алаңдары бар. Сондай-ақ жас мамандардың дене тәрбиесімен шұғылданулары үшін волейбол, баскетбол алаңдары мен теннис корттары жұмыс істейді. Жаңа жатақхана ғимараты 32723 шаршы метр аумақты алып жатса, оның тұрғынжайлары 10850 шаршы метр көлемге қоныстанған. Жатақханада барлығы 750 тұрғынжай бөлмелері бар. Оның 500-і бір орындық, 250-і екі орындық бөлмелер. Бір орындық бөлмеге жас мамандар айына 16200 теңге, екі орындық бөлмелерге 11700 теңге пәтерақы төлейді.
Мемлекеттік қызмет істері жөніндегі агенттік төрағасының орынбасары А.Көмекбаевтың айтуынша, бұл жатақханаға елордадағы 45 мемлекеттік органның жас мамандары қоныстанатын болады. Агенттік әрбір мемлекеттік органға тиісті квота береді. Ал квота алған мемлекеттік қызмет саласы жатақханаға кімді жіберетіндіктерін өздері шешетін болады. Заман талабына сай жабдықталған бұл жас мамандар жатақханасын салуға бюджеттен 2 миллиард 759 миллион теңге қаржы бөлінген. Қазір орталық мемлекеттік органдардың 500 жас маманы жатақхана кілттерін алды. Ал тамыз айында қалған 500 маманға бөлмелердің кілті тапсырылатын болады.
Жаңа жатақханадан жеке бөлме алған бір жас маманды әңгімеге тарттық. Өзін Асхат Ескендіровпін деп таныстырған жас жігіт Қостанай облысынан келген екен. Ол облыстағы аймақтық мемлекеттік қызмет істері жөніндегі басқармада бір жылдан астам еңбек етіп, орталық аппараттың шақыруымен Астанаға келіпті. Айналасы 1-2 айдың ішінде агенттік жас маманға жаңа жатақханадан орын бөлген. “Елбасы Нұрсұлтан Назарбаев жас кадрлардың жемісті еңбегі мен одан әрі өсу баспалдақтары үшін шынайы көмегін жасап отырады. Мен өз басым жас маман ретінде Мемлекет басшысының қамқорлығын үнемі сезініп келемін. Сол үшін Елбасына айтар алғысым шексіз”, дейді ол.
Жылқыбай ЖАҒЫПАРҰЛЫ.