Әнші Роза «Мен сыйға тартқан орамал» дүкенін ашты

Ұлттық бояуынан ажырамаған халықтың сүйікті әншісі, бес баланың анасы Роза Әлқожа өзінің жеке кәсібін бастағаны жайлы алдымен әлеуметтік желідегі достарынан сүйінші сұраған-ды. Әншінің бұл бас­тамасы көпшілікке бірден ұнап, әр елге еліктей бергенше, орамалды кие тұтқан аналарымыздың өнегесін ұлықтайық деп, жақсы лебіздерге бөленген еді. «Қазақтың қыз-келіншектеріне арнап әдемі, сапалы, өзіміздің дәстүріміз бен ділімізге сай киім­дер мен орамалдар сататын дүкен ашу біраздан бері ойда жүр­ген еді. Енді, міне, осы игі істі бастаудың сәті келді. Дүйім жұрт­қа өзімді сүйкімді еткен «Мен сый­ға тартқан орамал» атты әннің атауын осы дүкенге беріп отырмыз. Өйткені, дүкенде негізінен қыз-келіншектерге арналған орамалдар, аналарға арналған ақ жаулықтар, қазақы ою-өрнек бедерленген бас киімдер сатылады. Сондай-ақ, үлкен апа-әжелерімізге арналған той көйлектерін де біз­дің дүкенімізден таба аласыздар. Қазіргі заманда жасы үлкен апаларымыз тойға жастардың стилінде киініп барып жүргенін көріп жүрміз. Үлкен кісілер өзі­міздің дәстүрімізге және қазіргі заманға сай әдемі көйлектер киіп, жаулығын салып жүргені қандай жарасымды болар еді. Жас қыздар мен келіншектерге арналған сәнді киімдер де бар. Біздің дүкендегі орамалдар, киім-кешектер арнайы стилистер мен дизайнерлердің қолдарынан шыққан» дейді оқырманнан алдымен сүйінші сұраған Роза Әлқожа «Алаш айнасы» сайтында. Айнаш ЕСАЛИ, «Егемен Қазақстан». АЛМАТЫ.