«Ардагерлерді ардақтайық» акциясы

Кеше Астанада «Нұр Отан» партиясының белсендісі, Мәжіліс депутаты Надежда Петухованың басшылығымен «Ардагерлерді ардақтайық» жобасының аясында Ұлы Отан соғысы ардагерлерінің өмір сүру жағдайын қайта зерттеу нәтижелері бойынша «Ұлт денсаулығы» сараптамалық тобының селекторлық байланыс режіміндегі кеңесі өтті. Отырыс жұмысына Парламент Мәжілісі мен мәслихаттардың депутаттары, Денсаулық сақтау және әлеуметтік даму министрлігінің басшылығы, «Ардагерлер ұйымы» РҚБ, үкіметтік емес ұйымдардың өкілдері қатысты. Отырыста Ұлы Отан соғысы ардагерлерінің өмір сүру жағдайы бойынша жүргізілген зерттеу нәтижелері мен дәрі-дәрмекпен қамтамасыз ету жағынан оларды әлеуметтік қорғау шаралары талқыланды. Партиялық куратор Надежда Пе­ту­хованың айтуынша, «Өткен жылы «Арда­герлерді ардақтайық» партиялық жоба­сының аясында 5,4 мың Ұлы Отан соғысы ардагерлерінің өмір сүру жағ­дайы зерттеліп, нәтижелері бойынша пар­тия тарапынан 10 мыңнан астам проб­лемалық мәселе бақылауға алынды». Аталған жұмыс жалғасуда және қайта жүргізілген 5 мың ардагердің өмір сүру жағдайын зерттеудің нәтижелері бойынша көбінесе медициналық қамтамасыз етуге қатысты 5,6 мың мәселе партия бақылауына алынды. Осы мәселелерді шешу мақсатында «Нұр Отан» партиясы мемлекеттік органдармен, үкіметтік емес ұйымдармен бірлесе отырып, ардагерлерді үйлерінде диспансерлік қарау, стоматологиялық медициналық көмек, стационарлық емдеу, медициналық-әлеуметтік қызмет жасау, дәрі-дәрмекпен, жедел жәрдемнің электронды белгі бергішпен қамтамасыз ету шаралары кіретін жүйелі жұмыс ұйымдастырды. Сонымен қатар, тұрақты көмек көрсету мақсатында әрбір ардагерге бастауыш партиялық ұйымдар және «Жас Отан» жастар қанаты қатарынан еріктілер бекітілген. «Ардагерлер ұйымы» Республикалық қоғамы Орталық кеңесінің төрағасы Өмірзақ Озғанбаев: «Отандық денсаулық сақтау саласын дамыту үшін елімізде аз нәрсе жасалып жатқан жоқ. Соғыс ардагерлерінің медициналық қамтамасыз етілуіне, соның ішінде Жеңіс мерейтойына дайындық барысында жүзеге асып жатқан қосымша шаралар үшін ерекше алғыс білдіреміз», деді. Кеңес нәтижесі бойынша тиісті мемлекеттік органдарға Ұлы Отан соғысы ардагерлерін медициналық қамтамасыз ету сапасын одан әрі жақсарту бойынша ұсыныстар жолданатын болады. Жақсыбай САМРАТ, «Егемен Қазақстан».