УЕФА Черногория мен Ресей мәселесін 8 сәуірде қарайды

АСТАНА. 3 сәуір. Футболдан 2016 жылғы Еуропа чемпионатына іріктеу турнирі аясында өткен Черногория мен Ресей арасындағы ойынның аяқсыз қалғаны белгілі. Жанкүйерлердің жаппай тәртіпсіздігіне байланысты 66-минутта тоқтаған матчтың мәселесін УЕФА 8 сәуірде қарайтын болды. Бұл туралы uefa.com хабарлады. Негізі УЕФА аталған іс бойынша тергеу жұмыстарын 30 наурызда бастап кетті. Футбол мамандары ойынның тоқтатылуына екі команданың да жанкүйерлері кінәлі екенін айтуда. Себебі, алаңға әртүрлі заттарды тек Черногорияның емес, сондай-ақ, Ресейдің де жанкүйерлері лақтырған. Осы жайтты ескеріп, УЕФА қос тарапты да жазалауы мүмкін. Айта кетейік, 27 наурызда 2016 жылғы Еуропа чемпионатына іріктеу турнирі аясында командалар бір-біріне қарсы алаңға шықты. Черногорияның Подгорица қаласында өткен ойын алғашқы минутта-ақ тоқтатылғаны есімізде. Себебі, жергілікті жанкүйерлердің бірі Ресей қақпашысы Игорь Акинфеевке пиротехникалық құрал лақтырған еді. Салдарынан ойыншы жарақат алып, алаңнан кетуге мәжбүр болды. 35 минуттан кейін қайта жалғасқан матч 66-минутта біржола тоқтатылды. Бұған жанкүйерлердің алаңға ойынға кедергі келтіретін заттардың толассыз лақтыруы себеп болды. Аталған кездесуге германиялық төреші Дениз Айтекин қазылық жасағанын айта кетейік. Еламан Қоңыр. Дерек: uefa.com. Сурет: ria.ru.