ҚОСТАНАЙ. 22 мамыр. Қазақстан Республикасы Ұлттық гвардиясының Қостанай қаласындағы №6697 әскери бөлімінің жеке құрамы Амангелді ауданындағы табиғи апаттың зардаптарын жою жұмыстарына қатысуда. Бұл туралы egemen.kz тілшісі хабарлады.
Әскери бөлімше командирінің орынбасары Нұрбол Амандықов басқаратын жеке құрамы 18 мамырдан бастап «Алтын дала» мемлекеттік табиғи резерватындағы қырылған киіктердің өлексесін жою жұмыстарын атқарып жүр. Далада өлген киіктерді теріп, тасу жұмыстары оңай болып тұрған жоқ. Сарбаздар ауа райының қолайсыздығына, жұмыстың ауырлығына қарамастан барлық тапсырылған міндеттерді мінсіз орындауда.
№6697 әскери бөлімшесіндегі клуб меңгерушісі Зарина Байғазинова: «Бұрын әскери бөлімше қоғамдық тәртіпті қамтамасыз ететін, қазір заң актілерінің бекітілуіне сәйкес әскери қызметкерлер табиғи апат зардапдарын жою жұмыстарына көмектеседі», деді.
Әскери бөлімше оқиға болған жерге 6 шатыр тікті, дала қосын орнатты. Сарбаздар Отан, мемлекет алдындағы барлық тапсырмаға әрқашан дайын. Табиғи апат орнындағы жұмыстарға сарбаздар күші үлкен көмек болып тұр. Отан алдындағы парыз мінсіз орындалуда.
Нәзира Жәрімбетова.
Дерек, сурет: egemen.kz
