Алматыда Панфиловтың немересін белгісіз біреулер соққыға жықты

АСТАНА. 4 сәуір. Кеңес Одағының Батыры Иван Панфиловтың немересі,  еліміздің танымал композиторы Бақытжан Байқадамовтың қызы Айгүл Байқадамованы өзінің үйінің алдында белгісіз біреулер соққыға жығып кетті. Бұл туралы tengrinews.kz хабарлады. А.Байқадамова: «Мені соқылағандар әлде біреулерден тапсырыс алған. Таяуда ғана мен әлеуметтік желі арқылы «Георгий лентасы» жайлы ашық ойымды білдірген едім. Қашанда турасын айтатын менің пікірім қарсыластарыма ұнамады», – дейді. Айта кетейік, оқиға 2 сәуір күні, қас қарайған уақытта орын алған. Ауладағы көлік жайдың алдында соққыға жығылған жәбірленушіні сол маңнан өтіп бара жатқан жігіт көріп, көмекке келген. Әлгі жігіт дәрігерлік жедел жәрдем шақырған. Алайда, полицияға хабарласуды Айгүл Байқадамованың өзі жөн санамапты. Бойынан үрей байқалмаған ол: «Мен батырдың ұрпағымын», – дейді. Полицейлердің айтуынша, қазіргі таңда жедел-тергеу шаралары жүргізіліп жатыр. Тергеу аясында сот-медициналық сараптама белгіленді. Талғат Райымбек. Дерек, сурет: tengrinews.kz.