АСТАНА. 5 шілде. Чилиде футболдан Америка Кубогы додасы аяқталды. Үш аптаға созылған байрақты бәсекеде Чили құрамасы құрлық чемпионы атанды. Ол финалда Аргентинамен кездесіп, ойын соңындағы пенальти арқылы жеңіске жетті. Бұл туралы championat.com хабарлады.
Шешуші кездесу аса тартысты болды. Қос тарап та жеңіс үшін аянып қалмады. Дегенмен, чилиліктердің өз елінде өткен додада топ жаруы үшін соңғы сәтке дейін табандылық танытқанын ерекше айтып өткен жөн. Әсіресе, Алексис Санчес, Артуро Видаль сынды Еуропада жасындай жарқылдап жүрген футболшылардың ойын өрнегі көпшілікті тәнті етті.
Матчтың негізгі және қосымша уақытында есеп ашылмады. Нәтижесінде Оңтүстік Америка құрлығының чемпионы пенальти арқылы анықталды. Аргентина сапынан Лионель Месси ғана өз мүмкіндігін мүлт жібермеді. Ал Гонсало Игуаин мен Эвер Банеганың соққылары қақпаға дарымады. Есесіне, Чили ойыншылары өздеріне берілген мүмкіндіктің барлығын тиімді пайдаланды. Соған сәйкес пенальти сериясы бойынша Чилидің пайдасына 4:1 есебі тіркелді.
Жалпы,турнир барысында Аргентинаның қарсыластарына қарағанда мысы басым болған еді. Алайда, финалдағы Чилидің жеңісіне лайықты бағасын беруіміз керек. Ол үшін ойынның статистикалық көрсеткіштеріне көз жүгіртсек жетіп жатыр. Финалда Чили құрамасы допқа иелік ету көрсеткіші бойынша 57% – 43% нәтижесімен басым болды. Қақпаға жасалған соққы жөнінен де алаң иелерінің пайдасына 18 – 8 дерегі тіркелді.
Бұл Чили үшін құрлық чемпионатындағы бесінші финал. Осыған дейінгі төртеуінде қарсыластарына жол беріп келген құрама өз елінде өткен доп додасында тарихында тұңғыш рет топ жарды.
Осы жеңіспен бірге Чили 2017 жылы Ресейде өтетін футболдан Конфедерация Кубогы турниріне жолдама алды.
Чилидегі додада үшінші орын Перу құрамасына бұйырғанын айта кетейік. Қола жүлде үшін ойында аталған ел Парагвайды 2:0 есебімен жеңді.
Еламан Қоңыр.
Дерек, сурет: championat.com.
