Өткен жылы шілде айында облыста «Жауынгерлік даңқ» кітабы жасалып, ол бүкіл аудандар мен қалаларды аралайтын болды. Мерекелік шараның шарты бойынша, кітапқа әр аудан, қала Ұлы Отан соғысындағы Жеңіске үлесі туралы жазып отыруы керек еді. «Жауынгерлік даңқ» кітабын бірінші болып Алтынсарин ауданы алды.
Ұлы Отан соғысына байланысты аудандағы тың деректер, көзі тірі соғыс ардагерлерінің естеліктері, майданда опат болған жерлестер туралы ізшілер тапқан материалдар, тылдағы ерлікке пара-пар еңбек жөнінде мәліметтер жазылды, бейнематериалдар түсіріліп, оның үнтаспасы кітапқа жапсырылды. Мысал үшін айтсақ, соғыс басталғанда ауданнан 3 мың адам майданға аттанған екен, содан елге 1571 жауынгер ғана қайтып оралған. Барлық күш-жігер майданға жұмылдырылды. Обаған ауданының тұрғындары 1941 жылдың өзінде майданға 108060 пұт астық, 11508 пұт ет, 180 пұт сүт, 37000 рубль ақша жіберген. Сонымен қатар, Қызыл армия жауынгерлері үшін 572 пар пима, 52 шолақ тон, 400 пар қолғап, 282 құлақшын, 347 төсек жаймасы, тағы басқа да жылы киімдер жинаған. Міне, соғыс жылдарындағы аудан тұрғындарының Отанды жаудан қорғаудағы осындай ерлігі туралы жүрек толқытар тарихи деректерді кітап кейінгі ұрпаққа жеткізеді. Кітапты алтынсариндіктер салтанатты түрде Қарасу ауданына табыс еткен. Онда жастар мен мектеп оқушылары соғыс тарихына, аталарының ерлік істеріне қанықты, тағзым етті. Осы шара жыл бойы жүргізіліп, «Жауынгерлік даңқ» кітабы облыстың бүкіл аудандары мен қалаларын аралады. Енді ол Қостанай қаласына қайтып оралды.
Облыс орталығындағы балалар шығармашылығы сарайында өткен Қостанай қаласының «Жауынгерлік даңқ» кітабын облыстық ардагерлер кеңесіне салтанатты тапсыру рәсіміне соғыс ардагерлері, тыл еңбеккерлері, әскери қызметкерлер мен жастар, оқушылар шақырылды. – Ұлы Отан соғысына 1,8 миллион қазақстандық қатысты, солардың тең жартысы туған жерге оралмады. Соғыс жылдары біздің өңірге тұтас зауыттар мен кәсіпорындар көшіп келіп, жұмысын жалғастырды. Қаламызға Херсоннан «Большевичка» тігін фабрикасы, Сталинградтан көшірілген әскери-авиациялық мектеп орналастырылды. Қазір алапат соғыстың куәгерлері арамызда тым азайып кетті, бүгінде Қостанай қаласында 122 соғыс ардагері тұрады, – деді Қостанай қаласының әкімі Ахмедбек Ахметжанов. Қала әкімі соғыс ардагері Бертран Рубинштейнге, Дмитрий Брусникке, Молдағали Жүнісбековке, Николай Степуринге, Николай Барабановқа мерекелік медаль тапсырды. Кітапты қабылдап алған облыстық ардагерлер кеңесі төрағасының орынбасары Вера Семенова Отан қорғаған аталар ерлігін ұмытсақ, болашағымыз да бұлыңғыр болатынын еске салды. «Бұл кітап ардагерлер ұйымдарының, архив қызметкерлерінің жанкешті жұмысының нәтижесі. Кітапта қан майданға Қостанай облысынан аттанған әр жауынгердің ерлігі туралы айтуға тырыстық, барлығын қамтығымыз келді. Ондағы соғыс ардагерлері мен майдан даласында қалған боздақтар, тылдағы қарттар мен әйелдер, балалардың жан аямас ерлік істері туралы материалдардың барлығы жүрекпен жазылды, толқымай оқу мүмкін емес. Бұл кітап сонысымен де қасиетті», деді Вера Григорьевна. «Жауынгерлік даңқ» кітабының жалғыз данасы ғана жасалды, оны көбейту үшін Жеңіс қорынан арнайы қаржы бөлінетін болады. Кітаптың облыстық ардагерлер кеңесіне салтанатты тапсырылуы патриоттық ән-бимен көркемделді.
Нәзира ЖӘРІМБЕТОВА, «Егемен Қазақстан».
ҚОСТАНАЙ.
