Реквием

Рухани келісім күні құрметіне «Астана Опера» театрының Үлкен залында Дж. Вердидің 200 жылдан бері өмір сүріп келе жатқан өміршең туындысы орындалмақ. Музыкалық қуатымен қайран қалдыратын жарқын шығарма опера өне­рінің белгілі шеберлері қатысуымен жүзеге асырылмақ. Оған айрықша мән беріліп оты­ру­ы­ның тағы бір себебі, мұндағы басты партияны Арменияның халық әртісі Барсег Туманян шырқайды. Мец­цо-сопрано партиясында – қазақ­стандық көрерменнің сүйікті со­листі, Қазақстанның еңбек сіңірген қайраткері Дина Хамзина. Сонымен қатар, әлемдік деңгейдегі басқа да театр­лардың спектакльдерінде жетек­ші партияларды орындаушы Жұпар Ғабдуллина – сопрано партиясында. Мария театрынан шақырылған тенор Михаил Векуа жоғарыда аталған жұлдыздар тізімін түйіндейді. Оның жібектей ескен тамаша дауысына Ис­пания, Франция, Алмания, Норвегия, Нидерланд, Австрия және, т.б. елдердің жұртшылығы етене қанық. Солардың ішінен, әншінің өткен жылы «Астана Опера» сахнасында Р.Вагнердің «Нибелунг сақинасы» тетралогиясынан «Рейн алтыны» операсында Логе партиясын (от құдайы) шырқағанын атап өтуге болады. Әлемді мойындатқан «Астана Опе­ра» театрының атақты хоры мен сим­фониялық оркестрі бас хормейс­тер, Қазақстанның еңбек сіңірген қайраткері Ержан Дәуітов пен белгілі дирижер, Қазақстанның еңбек сіңірген қайраткері Абзал Мұхитдиновтің басқаруымен өнер көрсетуі айшықты кешке айрықша реңк берері сөзсіз. Еске сала кетейік, «Реквием» ал­ғаш рет 1874 жылдың 22 мамырында ғажайып хордың, оркестрдің және италиялық әншілердің қатысуымен Миланда орындалған болатын. Ол кезде дирижерлік тізгінді Вердидің өзі ұстаған екен. Санаулы күндерден кейін «Реквиемді» миландық «Ла Скала» театры қойса, одан кейін туынды Парижде, Венада, Петербургте һәм басқа қалаларда үлкен табысқа жеткен. Қай жерде болмасын Вердидің айтулы туындысын жұрт ыстық ықыласпен қабылдап, тіпті кей жағдайда жекелеген нөмірлерін қайталап тамашалауды талап ететін болған. Жалпы, бұл «Реквием» В.А. Моцарттың «Реквиемінің» жанында аталған жанрдағы ең жиі орындалатын шығармалардың бірі болып саналады. Ал «Астана Опера» төрінде музы­калық туынды ерекше күйде орындалады. Өйткені, I Дүниежүзілік рухани келісім конгресінің үндеухатында 18 қазанды Рухани келісім күні, қақтығыстар мен соқтығыстарды тоқтату күні, татуласу жолдарын іздеу, адамдар арасында біріне бірі түсіністікпен қарауды қалыптастыру күні, жақындарына мейірімділік пен көмек көрсету күні деп жариялау туралы шешім қабылданғаны мәлім. Жиырма жылдан бері елімізде үзілмей аталып келе жатқан келісім мерекесімен мұндай ірі туындының сәйкес келуі тегін оқиға болмаса керек. Қаршыға КҮЛЕН. АСТАНА.